LlGC Llsgr. Llanstephan 4 – tudalen 2r
Claddedigaeth Arthur
2r
panyỽ o|honno y buassei agheuaỽl ef.
yn|y dryded rann o|r bed megys o|r deu+
parth y waeret yd oed esgyrn gỽenhỽ+
yuar y wreic ual y geỻit eu hadna+
bot yn vanolach ac yn wreigeid. ac
ym|plith y rei hynny y kaffat pleth
o waỻt melyn. tec oed edrych arnaỽ.
ac ar y bleth honno y dodes manach o|r
vanachlaỽc y olỽc a ry dathoed y·gyt
a|r niuer ỽrth agori y bed. ac yd argan+
uu ym blaen paỽb. a bryssyaỽ a|oruc
ac ysglyfyeit y bleth. ac val y kymerth
yn|y laỽ a|e|dangos a phaỽp yn edrych
ac yn ryuedu y thecket yn|deissyfyt
yg|gỽyd paỽp y|difflannaỽd o|e laỽ. ac
nyt heb wyrtheu y damchweinyaỽd hyn+
ny. ac y dangosset yn honneit y baỽp
ac yn bennaf y|r creuydwyr a|dathoed
yno. y rei ỻeiaf a berthyn udunt nat
edrych na theimlaỽ bruger* gỽreic. a
bot pop peth bydaỽl yn|daruodedic ac
yn sathredic ac yn bennaf oỻ y petheu
teckaf o|edrych arnunt. megys y tystir
trỽy vraỽt ac aỽdurdaỽt y|doeth. yr
hỽnn a|dyweit. Tegỽch a|gosged dynaỽl
bryt. cribdeiledic yỽ a buan. a|chynt
| « p 1v | p 2v » |