LlGC Llsgr. 3035 (Mostyn 116) – tudalen 1r
Ystoria Dared
1r
P *elleas a oed vrenhin y|ghastell a elwit pelo+
peus a braỽt a oed idaỽ a elwit eson
a hỽnỽ a|oed a mab idaỽ a elwit jason a hỽnỽ
a oed da y gampeu ac a rodei nerth y|baỽb
o|r a oed dan deyrnas pelleas a|charedic
gantaỽ ef hoỻ beỻenigẏon a|cheredigion
ynteu gantunt hỽy A gỽedy gỽelet o pelleas|vrenhin
jason yn garedic gan bop dyn ofyn a gymerth pelleis
wneuthur y vrat ohonaỽ ef a|e ỽrthlad ef o|e deyrnas.
ac o|achaỽs hẏnẏ yd edewis peleas y jason pop peth
o|r a aỻei ef yr mẏnet o·honaw ef y|r ynys a|elwit
colcos y|geissaỽ yr hỽrd a oed a|chroen eureit a idaỽ
a|e dỽyn y dreis. kanẏs hẏny a vydei glot vaỽr i|w fi+
lỽryaeth ef a gỽedy clybot o Jason ymadraỽd y brenhyn
megys yd oed deỽr a maỽrurydus ac y|mynei ef
gỽybot deuodeu pop lle kenys ef a dybygei y vot
yn glotuorussach rac ỻaỽ bei dyckei ef y drais|yr
hỽrd a|r croen eureit o ynys golcos. Ac yna y dywaỽt
jason ỽrth beỻeas yd ae ef y|r ỻe yd archassei ef idaỽ
vynet bei kaffei ef nerth a|chetymdeithon ac yna y
peris y brenhin galỽ ar arcỽs saer kyỽrein ac erchi
a|wnaeth idaỽ gỽneuthur llog deckaf a aỻei en
herwyd ewyỻus jason. ac yna yd aeth whedel drỽy
hoỻ roec bot yn gỽneuthur ỻog y|jason ẏ vynet y
geissaỽ yr hỽrd a|r croen eureit o ynys colcos. Ac
yna y|deuthant y|gydymdeithon ef o pop gỽlat at
jason ac adaỽ a|wnaethant hỽy vynet y gyt ac ef
a|diolỽch a|wnaeth yn vaỽr udunt hỽy. ac erchi
a oruc vdunt vot yn baraỽt erbyn pan uei amser
y gychwynu udunt hỽy. Ac yna y gỽnaethpỽyt
The text Ystoria Dared starts on line 1.
| p 1v » |