LlGC Llsgr. 3035 (Mostyn 116) – tudalen 202r
Brut y Tywysogion
202r
negi y|weithredoed ac y cladỽyt yn aber conỽy wedy kymrẏt
abit crefyd ymdanaỽ. ac yn|y ol ynteu y gỽledychaỽd. dauid.
y vab o siwan verch jeuan vrenhin y vam. Mis mei rac·ỽẏneb
yd aeth. dauid. ap. ỻywelyn. a barỽneit kymry gyt ac ef hyt yg|kaer
loyỽ y ỽrhau y henri vrenhin y|ewythẏr ac y gymryt y gan+
taỽ y|gyuoeth ẏn gẏfreithaỽl. ac yna yd anuones y saesson
waỻter marscal a ỻu y·gyt ac ef y|gadarnhau aber teiui.
Y|vlỽẏdẏn rac·ỽyneb yd aeth oto gardinal o loeger ac y
delit ef a ỻawer o archescyb ac esgyb ac abadeu ac eglỽys+
wẏr ereiỻ y·gyt ac ef y|gan frederic amheraỽdyr gỽr a oed yn
yskymun yn ryfelu yn erbyn grygori pap. a|gỽedy mynet y
cardinal o loegẏr. y|kynuỻaỽd y brenhin lu ac y doeth y dares+
tỽg tywyssogyon kẏmrẏ ac y kadarnhaaỽd casteỻ y garec
yn ymyl y diserth yn tegeygyl ac y kymerth ỽystlon y gan
.dauid. ap. ỻywelyn. y|nei dros ỽyned ar talu o|dauid y ruffud ap gỽen+
ỽynỽn y hoỻ dylyeit ym|powys. ac ẏ veibon Maredud ap ky+
nan y|hoỻ dylyet y|meironyd a|chan|dyuynu. dauid. y lundein
y|r cỽnsli a dỽyn y·gyt ac ef ruffud y vraỽt a|r hoỻ garch+
arorẏon a oed y·gyt ac ef yg|karchar y brenhin y lundein.
ac yna y bu varỽ y|naỽuet grygori pap Y vlỽydyn rac·ỽy+
neb ychydic wedy y|pasc y|mordỽyaỽd henri vrenhin y peitaỽ
y geissaỽ y gan vrenhin freinc y|dylyet ar y dired a dugassei
vrenhin freinc y|gantaỽ kyn no hẏnẏ ac nys cauas. Y vlỽy+
dyn honno. Namẏn wedy geỻỽg y jeirỻ drachefẏn y trigyaỽd
ef a|r vrenhines y|mỽrdyỽs. Y|vlỽydẏn hono y|kadarnhaaỽd
hyn|o gestyỻ y gymry y gan vaelgỽn vychan garthgrugẏn
y|gan jon mynỽy bueỻt. y gan rosser mortymer maelenyd
ac yna y bu varỽ gruffud ap maredud ap yr arglỽyd rys arch+
diagon keredigyaỽn. Y|vlỽydyn rac·ỽyneb yd ymchoelaỽd
| « p 201v | p 202v » |