LlGC Llsgr. 3035 (Mostyn 116) – tudalen 33v
Brut y Brenhinoedd
33v
yỽ damweinaỽ y vudugolyaeth. kanys mỽy deir gỽeith
oed lu freinc no ỻu brutus kẏt ry|bylit o|r dechreu
ỽynt o|r diwed ymgyweiryaỽ a chyrchu gỽyr troea.
a ỻad ỻawer o·nadunt ac eu kymeỻ y|r casteỻ dra+
chefyn A|medylyaỽ a wnaethant eu gỽarchae yno
yny vei reit vdunt drỽy newyn ym·rodi yn ewyỻ+
us y freinc. A gỽedy dyuot y|nos y kauas gỽyr tro
yn eu kygor mynet corineus a|e wyr gantaỽ aỻan
hyt y|myỽn ỻỽyn coet oed gyr eu ỻaỽ a ỻechu yno
hyt y|dyd a|phan delei y dyd mynet brutus a|e lu
aỻan y ymlad a|e elynyon a|phan vei gadarnaf
yr ymlad dyuot corineus a|e vydin gantaỽ o|r
parth araỻ ẏn ol y elynyon ac eu ỻad. a megys y
dywedassant y·veỻy y gỽnaethant o gyt·duundeb
a|thranoeth pan doeth y dyd bydinaỽ a wnaeth brutus
a mynet allan y|r ymlad. A|r freinc a gyuodes yn eu
herbyn. Ac yn|y ỻe y|syrthỽys ac y brathỽyt ỻawer
o|pop parth Ac yna y|lladaỽd gỽas jeuanc o dro nei
y|r brenhin. sef oed y enỽ turn. Ac vn cledyf whech
chanỽr. Nyt oed eithẏr corineus yn y ỻu gỽas deỽ+
rach no hỽnnỽ. Ac eissoes yd amgylchynỽys ỻuos+
sogrỽyd o|e elynyon ef a·c y|ỻas turn. Ac o|e enỽ
ef y gelwir hyt hediỽ turon Ac ar hyny y doeth
corineus a|their mil o wyr aruaỽc gantaỽ yn ol y
freinc yn diarỽybot a gỽneuthur aerua vaỽr o+
A phan welas y freinc hynny kymraỽ ~ ~ nadunt
a wnaethant o dybygu bot yn vỽy noc yd oed
y|ỻu a chymryt eu fo Ac eu kymeỻ a oruc gỽyr
tro ac eu ỻad ac eu gỽassgaru yny gaỽssant y vu+
dugolyaeth. a|chyt bei vaỽr defnyd ỻewenyd y vru+
tus y vrutus
| « p 33r | p 34r » |