LlGC Llsgr. 3035 (Mostyn 116) – tudalen 72v
Brut y Brenhinoedd
72v
A|th vrodẏr ti yssyd ry ieueinc ỽrth wneuthur brenhin
o·nadunt Ac ny welaf inheu o|th lin titheu a|aỻho bot
yn vrenhin. Ac ỽrth hynnẏ o bydy titheu ỽrth gygor
ac achwanegu medyant a|chyuoeth i|minheu. Mi
a ymchoelaf ỽyneb paỽb o|r teyrnas parth ac attat
titheu Ac a baraf dy dynu o|r abit hỽnn. kyt bo
gỽrthỽyneb gan yr vrdas a|th wneuthur yn vrenhin
A|phan gigleu. Constans yr ymadraỽd hỽnnỽ. ỻawen+
hau a wnaeth yn vaỽr. Ac adaỽ drỽy aruoỻ rodi
idaỽ pop peth o|r a uynnei Ac na wnelhei dim o|r
vrenhinyaeth namyn drỽy y gygor A|e gymryt
a oruc gỽrtheyrn gỽrtheneu a|e tynu o|e vynech+
tit a|e wisgaỽ o vrenhinyaỽl diỻat A|dyuot ac
eff hyt yn ỻundein. Ac yna o vreid kaffel kanhat
y bobyl o|e drychafel yn vrenhin Ac yn yr amser
hỽnnỽ marỽ vuassei kuelyn archescob ỻundein.
Ac ỽrth hynẏ ny chahat vn escob a gymerei ar+
naỽ y gyssegru ynteu yn vrenhin ỽrth y|tynnu
o|r creuyd. Ac eissoes yr hyny nyt ebyr·gofes
Gỽrtheyrn y gỽeithret hỽnnỽ namyn yn ỻe
escob yd aeth e|hun a|chymrẏt y|teyrnas a|e dodi am
ben constans ac veỻy y vrdaỽ yn vrenhin. ~
A gỽedy drychafel constans yn vrenhin. y|rodes
ynteu ỻywodraeth y teyrnas oỻ yn ỻaỽ ỽrth+
eyrn ac e|hun hefyt a ymrodes ym pop peth
ỽrth y gygor. kanys am·gen dysc y dyskassei yn|y
claỽstỽr no ỻywyaỽ brenhinyaeth A gỽedy kaffel
o ỽrtheyrn medyant kymeint a hỽnnỽ yn|y laỽ
medylyaỽ a oruc py ansaỽd y gaỻei kaffel e|hun
y vrenhinyaeth. kanys hyny yd oed yn|y dam·unaỽ.
| « p 72r | p 73r » |