LlGC Llsgr. 3036 (Mostyn 117) – tudalen 113
Brut y Brenhinoedd
113
guedy y hyspeilaỽ uelly lu o|e marchogyon. y kyuo+
dassant yn an herbyn ninheu wedillon truein a
edewit yn yr ynyssed oc an kylch. A|r ynys oed gyf ̷+
laỽn o eur ac aryant a goludoed ereill. y hanreithaỽ
yn gyn lỽyret ac nat edewit dim yndi o|r y gallo neb
ymossymdeithaỽ yndi eithyr y|neb a allo ymborth
ar hely. kanyt oed gedernyt ymladwyr a allei ỽrth+
ỽynebu udunt. Ac ygyt a hynny neur deryỽ y|wyr
rufein blinaỽ weithon mal na chaffỽn y|gantunt
ỽynteu neb ryỽ amdiffyn. Ac ỽrth hynny yd ym
ninheu yn guediaỽ dy trugared titheu hyt pan ro+
dych titheu nerth a chanhorthỽy ac amdiffyn oho+
not tu hun y|teyrnas yd ỽyt dylyedaỽc arnei. cany
dyly neb y|goronhau yn well no thydi o goron custen+
hin a maxen wledic. kanys y|guyr hynny yssyd ge+
reint it. Ac ỽrth hynny parota lyghes a deret y|gym+
ryt teyrnas ynys prydein. A minheu a|e rodaf hi
y·rỽg dy dỽy laỽ ti. Ac ar hynny yd attebaỽd Aldỽr
y archescob. A ỽrda heb ef. ef a uu amser na ỽrthodỽn
i teyrnas ynys prydein o bei a rodhei im. kanys
mi a|tebygaf nat oes teyrnas ffrỽythlonach na
guell no hi tra gaffet yn hedỽch. Ac ar aỽr hon eisso+
es can kyu ryỽ dryc·tyghetuen a|ryuel a|hi. kas
yỽ genhyf|i hi a chan pop tywyssaỽc. A thros pop
peth o|r a gyueryỽ a hi dryc·arglỽydiaeth guyr
rufein a argywedỽys yn uỽyhaf idi. hyt na eill
neb tywyssaỽc bellach gynhal y theilygdaỽt idi.
| « p 112 | p 114 » |