LlGC Llsgr. Peniarth 11 – tudalen 258v
Ystoriau Saint Greal
258v
Y r ystorya yssyd yn|dywedut rodi o|r brenhin y·gyt a|la+
ỽnslot deugeint marchaỽc urdaỽl. a|dyuot o·honaỽ hyt
y ỻe yd oed magdalans. a chynn gỽybot o·honaỽ ef y dyuot ~
neur daroed y laỽnslot dryỻyaỽ raffeu y ỻestri a|r hwyleu a|r|hỽ+
ylbrenneu. a|r saỽl a gafas o|r|ỻestri ef a|beris eu ỻosgi. a|r dryỻ
araỻ a|aeth gan y mor. A|gỽedy hynny ỽynt a|draỽssant ym+
mysc tylwyth magdalans ac a|e ỻadassant. a|r rei o·nadunt a
ffo·assant tu a|e ỻongeu. ac ny bu y* vwyn y kyweirdeb a gaỽs+
sant arnunt. a|r brenhin e|hun a geissyaỽd tu a|e long. a
laỽnslot a|e hymlityaỽd hyt y mor. ac yno yng|gỽyd y|wyr ef
a|e ỻadaỽd. a gỽedy hynny ỽynt a|ladassant y gỽyr ac a|e bwr+
yassant gan y mor. Yr ynys honno a|rydhawyt trỽy laỽnslot.
Odyna ef a|aeth y|r ynyssed ereiỻ a|daroed y vagdalans eu hen+
niỻ ac eu trossi y|r gret drỽc rac ovyn eu hangeu. ac ynteu
a|e gossodes ỽynt yn|y mod y buassynt o|r blaen. Ac ueỻy efo a
gerdaỽd o ynys py gilyd yny doeth y|r alban yn|y ỻe y buas+
sei gynt. A|phan y gỽeles niuer y|wlat ef yn|dyuot ỽynt a
wybuant daruot idaỽ ỻad magdalans. a|diruaỽr lewenyd a
gymerassant yndunt. Odyna ef a|beris parattoi ỻestri i+
daỽ y vynet y vrenhinyaeth orient yr honn a vuassei eidaỽ
magdalans. a|r|wlat honno a|oed yn wac ac yn enwedic o|ar+
glỽydi. kan·ys laỽnslot a|e ỻadassei y·gyt a magdalans. Laỽnslot
hagen a|dugassei gyt ac efo y milwyr goreu. ac a|doeth y|r wla˄t
a|ỻynges vaỽr ygyt ac ef. ac a|dechreuaỽd eu distrywyaỽ y rei
| « p 258r | p 259r » |