LlGC Llsgr. Peniarth 18 – tudalen 9v
Brut y Tywysogion
9v
lettyv hep ỽneuthur dim drỽc amgen. Ac ual yd
oedynt ynn dỽyn eu hynt nachaf ỽyr meironnyd
yg|kyfrỽg mynyded ynn anyalỽch. ynn vydin gyỽ+
eir ynn kyuaruot ac ỽynt. Ac yn|y ruthraỽ. Ac yn|y
kyrchu. Ac ynn dodi gaỽr arnunt. Ac ỽyntỽy hep
tybygu dim vrthunt. Ac ar y|kyrch kynntaf y|fo+
assant. Ac y deuth yoỽein. A phann ỽelas gỽyr mei+
ronnyd ef ynn kyrchu ynn ỽraỽl. ac ynn baraỽt
y|ymlad. ffo ynn deissyuyt a orugant. Ac ỽy a|e hym+
lidassant ỽynt hyt eu gỽlat. a|diffeithaỽ y|ỽlat
a orugant. a llosci y|tei ar yteu. a llad yr yscrybyl
kymeint a gaỽssant hep dỽyn dim gantunt. A gỽe+
dy hynny y daeth madaỽc y poỽys. Ac oỽein a|ym+
hoelaỽd ef a|e ỽyr y geredigyaỽn. lle yd oed y|tat yn
gỽledychu. ac ynn pressỽylaỽ. a thrigyaỽ a|oruc ef
a|e getymeithon yn|y lle y|mynnaỽd. A choffau dyuo+
dyat y|dat kynn o|hynny yr kyuoeth. canys y|get+
ymdeithon aethant y|dyuet ac yspeilaỽ y|ỽlat. a da+
ly y|dynyon. ac eu dỽyn ynn rỽym hyt y|llogeu a|da+
thoed gann yoỽein o Jỽerdon. Ac etỽa y|mae ynn
trigyaỽ ynn teruyneu y|ỽlat. Ar eilỽeith yd|aethant
a galỽ ynuydyon keredigyaỽn y chỽanecau y|rif
a|chyrchu dros nos y ỽlat. a|e llosci. a|llad paỽb o|r a
gaỽssant yndi. ac yspeilaỽ ereill. a|dỽyn ereill gan+
tunt yg|karchar. Ac eu gwerthu y dynyon. neu y
hanuon ynn rỽym y|r llogeu. A gỽedy llosci y|tei
| « p 9r | p 10r » |