LlGC Llsgr. Peniarth 32 (Y Llyfr Teg) – tudalen 153
Llyfr Iorwerth
153
a|e dyfnet a|e ỻet. a|e har. ac ỽrth honno gỽne+
ler y baỽp kystal a|e gilyd. O deruyd. bot amrys+
son y·rỽng deu gyuarỽr am tir gỽyd. ac araỻ
ffaeth. a|r neiỻ yn mynnu eredic tir gỽyd. a|r
ỻaỻ heb y vynnu. onyt amot a|e dỽc racdaỽ. iaỽn
yỽ idaỽ eredic y|r ỻaỻ y tir a|vo ganthaỽ. O|deruyd.
bot amrysson y·rỽng deu gyuarỽr. a|r neiỻ
yn mynnu eredic ympeỻ a|r ỻaỻ yn agos. kyfreith.
a dyweit na dylyant vynet namyn hyt y
ỻe y gaỻo yr ychen kyrhaedu eu gỽed ac eu
budelỽ yn wann ual yn gryf yn|y kymỽt.
Kyfreith a|dyweit. na eỻir kymynnu ychen
a vo yg|kyuar heb ganhat y kyuarwyr; kanny
dyly neb kymynnu namyn a vedo. ac na med
ynteu ar hỽnnỽ. Kyfreith a|dyweit na dylyir
gỽystlaỽ ychen a|vo yng|kyuar nac eu hata+
uaela. kanny|dyly neb gỽystlaỽ namyn a vo
yn|y vedyant. a hỽnnỽ nyt ydiỽ. Pỽy|bynnac
a|wnel kyuar. a gỽedy hynny kyfaru ac araỻ;
kyfreith. a|dyweit dylyu o|r ychen vot ỽrth y kyuar
kyntaf. a|chyt gỽnel ynteu cant kyuar gỽe+
dy hynny; ef a|dyly kynnal penn yr ieu. ym+
pob ỻe o|r y gỽnel. Pỽy|bynnac a|wnel kyuar
ac na|del yn vuyd y eredic. na|dyd na deu y bo
heb dyuot. kyfreith. a|dyweit nac o|e vod nac o|e gym+
heỻ y del; na|dyly ef dim o|r a|ardher hebdaỽ.
| « p 152 | p 154 » |