LlGC Llsgr. Peniarth 45 – tudalen 25
Brut y Brenhinoedd
25
lle ỽrth pressỽylaỽ yndaỽ. Ac gỽedy gwel+
et o|r keỽri wynt yn damgylchynu yr ynys
fo a wnaethant y ogoueu y mynyded ac y+
na o ganyat Brut y rannỽyt yr ynys ac y
dechreuit diwyllaỽ y tired ac adeilat y tei
ac ar uyr amser gỽneuthur diruaỽr gyua+
ned yndi. Ac y mynỽys Brut galỽ yr yn+
ys o|e enỽ ef bryttaen ar genedyl yn ury+
tanneit ar ieith a elwit gynt ieith tro ne+
u gamroec a elwit gwedy Brytannec ac
o|r dysc hỽnnỽ y mynỽys Corineus galỽ yr
ran ynteu o|r ynys o|e enỽ ynteu kernyỽ
ar pobyl yn corneueit Canys pan ranỽyt
yr ynys y cauas Corineus dewis ac y dewis+
sỽys ef y rann honno Canys yno yd oed am+
laf y keỽri a digrif oed gantaỽ ynteu ym+
lad a rei hynny ac ym plith y keỽri yd oed
un ohonunt antynghetuenaỽl y ueint a deu+
dec cufhyt yn|y hyt a chymeint y angerd
ac y tynnei derwen uaỽr o|e gỽreid megys
gwialen uechan. Ac ual yd oed Brut dyd+
gweith yn aberthu y diana nachaf y kaỽr
hỽnnỽ ar y ugeinuet o|r keỽri ereill y gyt
ac ef ac yn gỽneuthur aerua uaỽr o|r bryttan+
neit ac eissoes eu kylchynu a wnaeth Bru+
| « p 24 | p 26 » |