LlB Llsgr. Harley 958 – tudalen 8r
Llyfr Blegywryd
8r
lu idi tri|chanu o gerd angaỽ* trỽẏ lef kẏ+
medraỽl. megẏs na rỽẏstro ar ẏ neuad.
Ẏ dir a geif ẏn|rẏd. Ac nẏ cheif ef dim ar
neithoreu gwaraged gỽrẏaỽc kẏn no hẏn+
nẏ. Sef uẏd penkerd bard gwedẏ enniỻo
kadeir. Nẏ dẏlẏ bard erchi dim heb ẏ ganhat
ef hẏt ẏ bo ẏ sỽẏd. o·nẏd bard gorwlat uẏd
kanẏs rẏd uẏd hỽnnỽ. kẏt gwahardo ẏ|bren+
hin rodi dim ẏ eircheit ẏn|ẏ wlat hẏt ẏm+
pen ẏspeit rẏd uẏd ẏ penkerd.
M edic llẏs ẏ sarhaet a|e alanas mal ẏ dẏ+
wespỽẏt vrẏ. Ef a eisted ẏn nessaf ẏ|r
penteulu. ẏ dir a geif ẏn rẏd. A march ẏ gan
ẏ brenhin. Ẏn rat ẏ medeginaetha ef sỽẏdo+
gẏon ẏ llẏs. oll. kanẏ cheif ẏ gantunt na+
mẏn ẏ diỻat creulẏt a torher a heẏrn. Eith+
ẏr o|r teir gwelẏ agheuaỽl a elwẏr o uẏỽn
dẏn. dros pob vn o rei hẏnnẏ ẏ keẏf punt
heb ẏ uỽẏt. neu naỽ ugeint a|e ẏmborth.
Sef ẏnt. torri pen dẏn hẏt ẏr emenhẏd neu
vrathu dẏn ẏn|ẏ arch hẏt ẏ keu. neu torri
vn o petwar post corff dẏn. dỽẏ vreẏch a deu
uordỽẏt. Ẏ uerch a uẏd vn vreint a merch
G Of llẏs a geif penneu [ bard teulu.
ẏr ẏchen a|r gwarthec a lather ẏn|ẏ
llẏs. Y uỽẏt ef a|e was a geif o|r llẏs. Ef
| « p 7v | p 8v » |