Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 88r
Ymborth yr Enaid
88r
Bellach kannys o|dỽyỽaỽl garyat annỽyl+
serch yr yspryt glan y|ryd y|dyỽededic yspryt
ysprydolyon weledigaethev yn|y marỽhunev ar
perleỽycuaev a|delont o|r serchaỽl garyat hỽnnỽ.
vrth hynny gỽybyder pa|ffuryf y|gallont dyuot.
Ac yn gyntaf pann eidunych eu dyuot gỽybyd
dy|vot yn dibechaỽt drỽy gredu ohonat yaỽnffyd
yr eglỽys lan gatholic. a bot gennyt gyfulaỽn o+
beith yn|y creaỽdyr gann y obryn arnaỽ o|th obrỽy+
olyon weithredoed kreuydusson. a gỽir garyat ar
duỽ. Ac ar gyfnessaf. Ac ymỽrthot a gỽydyeu. Ac
aruer o|r kampeu nerthuaỽrussyon ac ymparat+
toi. Ac ymluneythaỽ yn|dy|wely wedy plygein.
nev wedy hanner nos yn ol yr|hun gynntaf neu
y|dỽy wedy gỽypych vot dy anyan yn orffỽyssaỽl
wastatwed ardymer heb na rỽy ormod na|ry|eis+
seu arnei. Ac yna drỽy wir garyat a chỽbyl ewy+
llys dy|gallonn glutuedylya am brif degỽch y ka+
rueiduab dyỽyỽaỽl a dyỽetpỽyt vchot. a|thebic
y|vot yrỽg y vreicheu. A|thitheu yrỽg y vreicheu
yntev yn ymwascu. ac yn ymgaru ac ef. gann ga+
darnn gredu. ac ymdiret yn hynny. Ac yna drỽy
y|wediaỽ ef galỽ yn garedic ar yr yspryt glan gann
dyỽedut yr emynn hỽnn o|r yspryt glan gann ga+
roli neu hopyaỽ dy gallonn idaỽ o|e holl ewyllyssus
serchaỽl garyat.
| « p 87v | p 88v » |