LlGC Llsgr. Llanstephan 27 (Llyfr Coch Talgarth) – tudalen 25r
Ystoria Lucidar
25r
yỽ kyflaỽn lewenyd y seint. a hynny yỽ dogyn o bop da
heb nebryỽ eissyeu. discipulus Ti a|m ỻenw·eist i o|lewenyd yn y|m
tynnwyt haeach y arffet y nef. a gỽelet wyneb yr|arglỽyd
yn yr wybyr. a ỽrth hynny ỻawen ỽyf am dy ymadrodyon
di. megys y neb a gaffei yspeil. ac hynny manac ym am
y poeneu. Magister Megys y keiff y neb yssyd gyfeiỻyon yn|detw+
yd y duỽ tragywydaỽl ogonyant yn|yr arglỽyd. veỻy yng
gỽrthwyneb y hynny y keiff y diryeityon a|e druein elyny+
on ef poeneu tragywyd. a megys y goleuheir y rei hynny.
o|r tegỽch mwyaf. veỻy y|byd y ỻeiỻ o|r aruthred mỽyaf. a Me+
gys y byd ysgaỽn y rei hynn o|r gỽeithret goruchaf. veỻy
y byd gorthrỽm y ỻeiỻ o|r|ỻesged mỽyaf. a megys y byd ka+
darn y rei hynn o|r nerth pennaf. veỻy y byd eidyl y ỻeiỻ
o|r gỽander mwyaf. a megys y keiff y rei hynn ehang ry+
dit. veỻy y keiff y ỻeiỻ kyving geithiwet. a megys y keiff
y rei hynn drythyỻỽch a diruaỽr ewyỻys. veỻy y keiff y* keiff*
y ỻeiỻ chwerwed a|diruaỽr drueni. a|megys y grymhaa y|rei
hynn o arderchaỽc iechyt. veỻy y diffyckya y ỻeiỻ o glefyt a
gỽander. a megys y byd budugaỽl y rei hynn o wynuyde+
dic vywyt. veỻy y kỽynant y ỻeiỻ o|e doluryeu hir·hoedli. a
megys y byd eglur y rei hynn o echtywynnedigrỽyd doethineb.
veỻy y byd tywyỻ y ỻeiỻ o aruthred ynvytrỽyd. kanys beth
bynnac a|wdont. o achwanec o ynvytrỽyd a dolur a|thrue+
ni y gỽybydant. a megys y kyssyỻta melys gedymdeithyas
y rei hynn. veỻy y poena chwerỽ elynyaeth y ỻeiỻ. a megys
y mae kytuundeb y·rỽng y rei hynn e|hun. ac y·ryngthunt
a|phob creadur. veỻy y byd anosgymot* y·rỽng y ỻeiỻ e|hunein.
| « p 24v | p 25v » |