LlGC Llsgr. 3035 (Mostyn 116) – tudalen 166r
Brut y Tywysogion
166r
amdiffyn o|r cestyỻ nessaf y dothoedynt ohonaỽ. megys y dy+
wedir y|myỽn brytanaỽl diaereb. y ki a|lya yr aryf y brather
ac ef. a gỽedy gỽasgaru y ỻu y·dan y coedyd ef a damwein+
aỽd y ywein ac ychydic o|nifer gyt ac ef. kyrchu y coet. o
amgylch degwyr a|phetwar|ugein ac yn edrych a|welyn oleu
dynyon yn ffo. na·chaf y|gỽelynt oleu dynyon yn kyrchu tu
a|chastel kaer vyrdin ỻe daroed udunt gỽneuthur eu hedỽch
ac eu hymlit a wnaeth hyt yn a·gos y|r casteỻ a gỽedy eu daly
yna ymchoelut hyt at y getymdeithon a|oruc. Yg|kyfrỽg
hẏnnẏ y damweinaỽd dyuot ỻu o|r flemisseit o ros y gaer vyr+
din yn erbẏn mab y brenhin a gerald ystiwart gyt ac ỽynt
na·chaf y rei a|diaghyssei yn dyuot dan ỻef tu a|r casteỻ ac yn
menegi y|hyspeilaỽ o|ywein ap kadỽgaỽn a|e hanreithaỽ. a|phan
gigleu y|flemisseit hẏnẏ ennynu a|wnaethant o kassaỽl kyg+
horfynt yn erbyn ywein o achaỽs y|mynych godyant a wna+
thoed ketymdeiton ywein vdunt kyn no hyny ac o|anogediga+
eth gelat ystiwart y gỽr y|ỻosgassei ywein y gasteỻ ac y duc+
assei y dreis nest y|wreic a|e anreith. Y|ymlit a orugant. ac y+
wein heb dybygu bot gỽrth·ỽynebed idaỽ a gymerth y hynt
yn araff. ac ỽynteu gan y|ymlit ef a doethant yn|ebrỽyd hyt
y|ỻe yd oed ef a|r anreith gantaỽ. a|phan welas kytymdeithon
ywein diruaỽr luosogrỽyd yn|y hymlit dywedut a|wnaet+
ant ỽrthaỽ ỻyma luossogrỽyd yn ymlit heb aỻu o|neb ym+
ỽrthlad ac ỽynt ac atteb vdunt a|wnaeth. nac offynheỽch
heb achaỽs bydinoed y|flemhisseit ynt. a gỽedy dywedut
hynẏ o neb vn gynỽryf. eu kyrchu a|wnaeth. a|diodef y kyn+
ỽryf a|wnaethant yn ỽraỽl gỽedy bỽrỽ saetheu o|pop tu y
dygỽydaỽd ywein yn vrathedic. a gỽedy y|dygỽydaỽ ef yd
| « p 165v | p 166v » |