LlGC Llsgr. 3035 (Mostyn 116) – tudalen 93r
Brut y Brenhinoedd
93r
ỽrth hynny y brenhin a vu ỽrth gygor eidal Ac a rodes
trugared vdunt Ac o agreiff octa y deuthant ossa a|r
saesson ereiỻ a|foyssynt ygyt ac ef a thrugared a
gaỽssant Ac y rodes y brenhin vdunt yna eistedua
ger ỻaỽ yscotlont Ac y kadarnhaỽd kygreir ac ỽynt
dan y arglỽydiaeth ef.
A gỽedy gỽelet o emrys y vudugolyaeth ef ar|y|e+
lynyon ef a elwis attaỽ y|tywyssogyon a|r jeirỻ
a|r barỽnyeit o|r teyrnas hyt yg|kaer efraỽc
Ac yna y gorchymynaỽd vdunt atnewydu yr eglỽys+
seu ac eu kyfanhedu ac eu hanrydedu paỽb onadunt
yn|y gyfoeth. kanys y|saesson a|r daroed vdunt dis+
tryỽ yr eglỽysseu hyt y dayar. A|r brenhin e|hun a
gymyrth arnaỽ wneuthur ar y|gost e|hun eglỽys
yr archescobty yg|kaer efraỽc Ac y·gyt a hynny e+
glỽys pop escobty yn|y teyrnas oỻ. Ac odyna gỽedy
yspeit pymthec niwarnaỽt gỽedy daruot idaỽ gos+
sot seiri a gỽeithwyr ym pop ỻe. ef a aeth hyt yn
ỻundein y|r ỻe nyt a·rbedassei gelynaỽl greulonder
A|dolur uu gan y brenhin gỽelet y distryỽ hỽnnỽ
A galỽ y kiỽdaỽtwẏr o|pop ỻe ac ymrodi o|e hatgy+
weiraỽ. Ac ef a ossodes kyfreitheu y teyrnas ac y at+
newydaỽd ac yd estynnaỽd y baỽb y dylyet ar tref
y dat a goỻassei yr hendadeu y rei hyny a rodes y|r
meibon ac y|r ỽyron. A|r tired a goỻyssynt eu priodor+
yon y rei hynny a|rodes emrys o|e gytuarchogyon A|e
hoỻ ynni a|e hoỻ lafur oed yn keissaỽ atnewydu y
teyrnas ac adeilat yr eglỽysseu a|chadarnhau hedỽch
a|thagnefed a|chyfreitheu Ac odyna yd aeth hyt yg
kaer wynt ỽrth lunyaethu hono megys pop vn o|r rei
| « p 92v | p 93v » |