LlGC Llsgr. 3036 (Mostyn 117) – tudalen 99
Brut y Brenhinoedd
99
uon yma. o achaỽs dy vot titheu yn kadỽ ffydlon ̷+
der ỽrth duỽ. Sef yỽ hynny ti a uuost yn ymgyghor
a|th wyrda py beth a wnelhut am elen dy verch;
a|th gyuoeth can yttoedut yn treiglaỽ parth a hene ̷+
int. Val nat oed haỽd it lywyaỽ dy teyrnas yn hỽy
no hynny. Ac yna rei a gyghorei it rodi coron dy teyr ̷+
nas a|e llywodraeth y|gynan meiradaỽc dy nei. A rodi
dy verch y|dylyedaỽc o|wlat arall. kanys ofyn oed ar ̷+
nadunt dyuot darystygedigaeth y teyrnas o delhei
vrenhin aghyfyeith arnadunt. Ereill a gyghorei
it rodi dy uerch y vn o dylyedogyon y teyrnas val y
bei vrenhin guedy ti. Ac eissoes y ran uỽyhaf o|th
wyrda a gyghores itt keissaỽ vn o amherotron rufein.
y rodut dy verch idaỽ a|th gyuoeth wedy ti. kanys
velly y tebygynt kaffel hedỽch. A rufeinhaỽl amher+
odraeth ac eu hamdiffynei. A llyma hediỽ arglỽyd
wedy ry anuon o duỽ y|guas ieuanc hỽn yma itti yr
hỽn a henyỽ o rufeinhaỽl amherodron A brenhinoly+
on vrytanyeit. Ac y hỽnnỽ o|m kyghor i y rodi ti dy
verch a|th gyuoeth guedy ti. Ac ygyt a hynny. edrych
ti vot yn gystal y|dylyet ef a|r teu ditheu ar ynys
prydein. kanys kar agos yỽ y gustenhin. A nei y
goel an brenhin ninheu. Ac nyt oed dylyet guara ̷+
fun y|r gỽr hỽnnỽ y uerch a|r vrenhinyaeth. Ac ufyd+
hau a wnaeth eudaf y|r kyghor hỽnnỽ. Ac o gyffre ̷+
din gyghor ynys prydein y rodet elen verch eudaf
a|r teyrnas genti y vaxen mab llywelyn. A guedy
| « p 98 | p 100 » |