LlGC Llsgr. Peniarth 11 – tudalen 98r

a chyn|santeidyet a|hi. Ac ỽrth hynny laỽnslot tec edrych di a|dy+

vot yn|diweir bellach o hynn aỻan. ual y|gaỻer kyffelybu dy diwe*+

rder di o|e gỽyrder hitheu. Ac ueỻy y para aỽch kedymdeithyas chỽi

aỽch deuoed yn hir. a|dos di yn|enỽ duỽ beỻach a gỽna megys y dyw+

edeis i. a|thi a|deuy yn ehegyr y|r ỻe y mae dy damunet. Paham ~

heb·y laỽnslot ae yma y trigyy di. Je arglỽyd heb ynteu. Ac yna y

gỽynt a|ysglyffyaỽd yr ysgraff. a|than ym·annerch y meudỽy a

laỽnslot a|ymwahanyssant. Eissyoes kynn y beỻau ef y meudỽy

a ymchoelaỽd attaỽ ac a|dywaỽt ỽrthaỽ. Laỽnslot tec heb ef pan we+

lych galaath dy uab. arch idaỽ wediaỽ duỽ drossof|i. Ac yna laỽnslot

a|beỻaaỽd y ỽrthaỽ. ac a|wediaỽd ar y|danuon y|r ỻe y gaỻei haedu

bod duỽ. Ac ueỻy y bu laỽnslot yn|yr ysgraff. mis ar untu heb vy+

net ohonei aỻan. ac o|r govynnir pa|delỽ y bu vyỽ ef y kyfarwydyt

yssyd yn menegi yma. panyỽ y gỽr a|rodes y bobyl yr israel y dỽfyr

o|r garrec. a|rodes idaỽ ynteu bop bore ar ol y wedi gyflaỽnder o

rat yr yspryt glan ual y tebygit idaỽ efo y vot yn ỻaỽn o|r bỽydeu

goreu. A nosweith yd oed ef wedy tiriaỽ yn|yr ysgraff yn ymyl ffo+

rest. ef a|glywei drỽst marchaỽc urdaỽl yn aruaỽc ef a|e varch. ac yr

aỽr y gỽeles ef yr ysgraff ef a|disgynnaỽd y ar y varch. ac a|dynna+

ỽd y ffrỽyn a|e gyfrỽy y arnaỽ ac a|e duc y|r ysgraff. a|than ymgro+

essi y|doeth ef y myỽn. A|phan y gỽeles laỽnslot efo yn dyuot y

myỽn attaỽ. nyt kymryt y|arueu a|oruc ef o|e ludulyas*. namyn dy+

wedut grassaỽ duỽ ỽrthyt varchaỽc urdaỽl. Ac yna y marchaỽc

a|vu ryued ganthaỽ glybot neb yn|yr ysgraff. kanys ny thebygas+

sei vot neb yndi. a dywedut ỽrthaỽ a|oruc. Arglỽyd heb ef. antur

da a|rodo duỽ y titheu. ac yr|duỽ dywet ym pa un|ỽyt. kanys chỽ+