LlGC Llsgr. Peniarth 12 rhan ii – tudalen 44v

ueỻy ny deuei vyth y|r deyrnas. ac o achaỽs hynny duỽ a|odefaỽd

newyn arnaỽ. megys y bei dir idaỽ lauuryaỽ. a gaỻu ohonaỽ

o|r achaỽs hỽnnỽ dyuot drachefyn. a|dyaỻ di hynny am yr eth+

oledigyon e|hun. kanys paỽp a|vyd yr poen y|r rei drỽc. discipulus a|oes

deruyn am hoedyl dyn megys na aỻo byỽ dros hynny na ma  ̷+

rỽ kynno hynny. Magister Ef a|ossodes duỽ y bob dyn pa|hyt y|dyly+

o byỽ yn|y byt hỽnn. ac ny dichaỽn neb vyỽ vn voment

hỽy no hynny. megys y dywedir. Ti a|ossodeist y teruyneu

y rei ny aỻant vynet heibyaỽ. ef a|dichaỽn marỽ hagen o

lawer o|ffyrd kynno|e|deruyn. ae o|e|lad ac arueu. ae o vỽyst+

vileit. ae o|e wennỽynaỽ. ae o|e|grogi. ae o|e losgi. ae o|e vodi. me+

gys y dichaỽn kyflocwas drỽc haedu o|e drycdeuodeu dỽyn y

gyfloc a|e yrru ymeith kyn·no|r oet. discipulus Praỽ. Magister Duỽ a|duc

meibyon yr israel o|r|eifft y rodi udunt y tir adawedic. ac

o achaỽs eu pechodeu ny|s kaỽssant. namyn kynn eu dyuot

yno y dygỽydassant oỻ yn|y diffeith. discipulus Ae pechaỽt y|r braỽt+

wyr boeni dynyon cam·gulus. Magister Pechaỽt ony|s poenant

kanys ỽynt a|ossodet yn dialwyr enwired duỽ yn|y ỻe hỽn+

nỽ. discipulus Ae pechaỽt y|r gỽassanaethwyr dihenydyaỽ y|rei cam+

gylus gỽedy y harcho y braỽdỽr udunt. Magister Nac ef na+

myn ymolchi y maent yng|gwaet y pechaduryeit. discipulus.

Beth am y rei a|dalyer yna yn gỽneuthur drỽc. ac a|uar+

ner y dihenyd. ac yn|y pỽngk hỽnnỽ dyuot ediuarỽch ud+

unt. a|oes obeith y|r rei hynny. Magister Oes vn maỽr. kanys

drỽy y boen honno ef a|burheir megys y ỻeidyr yn|y groc.

ereiỻ a iacheir drỽy wedieu seint. discipulus. Pa achaỽs y dysc y

meibyon yn weỻ no|r hen dynyon. Magister Am vot eu heneint