LlGC Llsgr. Peniarth 12 rhan ii – tudalen 48v
Ystoria Lucidar
48v
ffyd y drindaỽt. a|thrỽy dec y dyeỻir hen dedyf o achaỽs
y dengeir dedyf. a|redec y mis yn|dec niwarnaỽt ar|hugeint.
ac ueỻy y dyeỻir beth bynnac a|bechaỽd dyn yn|y missoed yn
erbyn hen dedyf a newyd dedyf Odyna y vlỽydyn yỽ crist
a megys y dywedir yr arglỽyd yỽ y vlỽydyn dangnefedus.
Y missoed yỽ yr ebystystyl*. cỽrs yr heul yỽ y vlỽydyn. megys
y dywedir. kỽrs y ỻoer yỽ y mis. ỽrth hynny y gỽneir purdan
y vlỽydyn. megys y madeuer idaỽ yn|hynny o ennyt beth
bynnac a|bechaỽd yn erbyn crist heul y wirioned. a|r|eglỽys
yr honn yssyd leuat yr deudeng|mis. sef yỽ hynny dysc y
deudec ebystyl. discipulus Pa ryỽ·beth yỽ purdan. Magister Y rei y byd pur ̷+
dan udunt yn|y byt hỽnn. megys govidyeu a choỻedeu a
wnel dynyon drỽc udunt. ereiỻ drỽy boeni ohonunt e|hun
eu|kyrff drỽy wylaỽ ac unprytyaỽ a|ỻauuryaỽ. Y ereiỻ y byd
purdan o|goỻi eu kenedyl ac eu|da. Y ereiỻ o heint. a|dolur. Y
ereiỻ o eisseu bỽyt a|diỻat. Y ereiỻ o odef anghev chwerỽ. Gỽ+
edy angeu y byd purdan y|r eneit. ac o ormod gỽres y tan.
ac o ormod gryfachedigaeth* oeruel. ac o ryỽ genedyl boeneu
ereiỻ. a mỽy yỽ y boen leiaf ohonunt no|r|boen vỽyaf a|aỻei
dyn yn|y byt hỽnn y vedylyaỽ. a|thra|vont ỽy yn|y poeneu
hynny. gỽeitheu yd ymdengys engylyon neu|seint ereiỻ ud+
unt y gỽnaethant ỽynteu enryded udunt ac ỽynt yn vyỽ
yn|y byt. ac a|vyrant awel nefaỽl ac arogleu hynaỽs ar+
nunt neu ryỽ solans yny vont ryd y vynet y|r neuad ny
chymer vn mann yndi. discipulus Ym pa|ryỽ ffuryf y gossodir ỽynt
yno Magister Yn|ffuryf y corfforoed y buant yma. ac ef a|dywedir
am y dievyl y|rodir udunt corfforoed o|r awyr o|e poeni yn+
dunt
| « p 48r | p 49r » |