LlGC Llsgr. Peniarth 190 – tudalen 158
Ystoria Lucidar
158
a|e wisgaỽ o|e diỻat e|hun. a|e gymryt yn uab
idaỽ. a|rodi brenhinyaeth yn|dref·tat idaỽ. veỻy
pan weles duỽ ninheu yn ỻỽch pechaỽt. y|n
drychefis y vyny drỽy ffyd. ac y|n|golches o
dỽvyr y bedyd. a dodi y enỽ teilynghaf e|hun
arnam. a|n|gỽneuthur yn etiuedyon ar y
deyrnas ef. megys y dywedir. Y|saỽl a|e kym+
erth ef. ef a rodes medyant udunt y vot yn
ueibyon y duỽ. a hynny y|r neb a|gretto
yn|y enỽ ef. a|chyt caffo vn gogonyant yn
ragoraỽl rac araỻ herỽyd eu gobrỽyeu.
Eissyoes. paỽp a|gaffant vn ty y tat o
nef. kyt boet o amryuael gyuanhedeu.
yr vn gyfloc hagen a|gaffant ỽy o edrych
ar duỽ. a chedymdeithas yr|engylyon. discipulus O
anryded y seint. Magister|anryded Josep a vydei
amharch ganthunt ỽy. owi o|r enryded a
gaffant ỽy. pan vo duỽ e|hun yn eu han+
rydedu megys y veibyon. a|r engylyon
yn eu perchi megys tywyssogyon. a|r hoỻ
seint yn eu hanrydedu megys dwyweu.
dylyet yỽ ar duỽ peri hynny udunt ỽy.
| « p 157 | p 159 » |