LlGC Llsgr. 3035 (Mostyn 116) – tudalen 199r
Brut y Tywysogion
199r
drỽy ganat a chygor. ỻywelyn. ap joruerth. Y|vlỽẏdẏn racỽyneb y bu varỽ
rys jeuanc ac y cladỽyt rẏs yn ystrat flur wedy kymryt
penyt a|chymun a|chyffes ac abit crefyd ymdanaỽ a gỽedẏ
hẏnẏ y cauas ywein ap gruffud y vn braỽt ran o gyfoeth
a|ran araỻ a|rodes. ỻywelyn ap joruerth y vaelgỽn ap rẏs Y|vlỽẏ+
dyn hono y|mordỽyaỽd gỽilim marchcal jarỻ penuro y|i ̷ ̷+
werdon [ Y|vlỽẏdẏn racỽyneb y doeth gỽilim marscal o J+
werdon a|ỻuossogrỽyd o varchogẏon a|phedyd gantaỽ
a diruaỽr lyges y|myỽn y|r tir amgylch sul y blodeu a|duỽ
ỻun y|kyrchaỽd a·ber teiui a|r dyd hỽnỽ y rodet y casteỻ idaỽ
a|duỽ merchẏr rac·ỽyneb y|tynaỽd y|gaer vyrdin ac ẏ cauas
y casteỻ hỽnỽ hefẏt. a|phan gigleu. ỻywelyn. ap joruerth hẏnẏ y|gỽr a|oed
gatỽryaeth y kestyỻ gantaỽ o·blegẏt y brenhin anuon
gruffud y vab a|diruaỽr luosogrỽyd o lu gantaỽ y ỽrthỽy+
nebu y|r jarỻ a|phan gigleu ruffud vot brẏt ẏ jareỻ* ar dy+
vot y ketweli kyrchu a|wnaeth a dylyedogyon kymry y+
gyt ac ef a choffau a|wnaeth rys gryc rac brat y|gan y bỽr+
deisseit a cheissaỽ kyffroi y kymrẏ y diogelỽch y coedyd
ac nys gadassant namyn kyrchu y dref a|wnaethant a
ỻosgi y|dref a|r eglỽys hyt y|prid a|phan gigleu y jarỻ hẏnẏ
kyrchu drỽy tywi a|wnaeth y bont gaer vyrdin ac aros
a oruc gruffud ap. ỻywelyn. yn ehofẏn a gỽedy hir ymlad y
ran vỽyaf o|r dyd ymchoelut a|wnaeth pop vn o|r deu
lu y ỽrth y gilyd y|pebyỻeu wedy ỻad ỻawer o bop tu
a brathu ereiỻ ac yna rac newyn yd ymheolaỽd gruffud.
ap. ỻywelyn. drachefẏn y|wlat. ac yna y kyweiraỽd y jarỻ gasteỻ caervyrdin
ac y dechreuaỽd adeilat casteỻ kil geran. ny bu beỻ wedy
dechreu y gỽeith yny doeth ỻythyreu attaỽ y gan y|brenhin
| « p 198v | p 199v » |