LlGC Llsgr. Peniarth 11 – tudalen 249r

y briant. gỽeỻ oed y arthur y gannattau ef vlỽydyn y ỽrthaỽ

no godef ryuel arnaỽ. a|diua y|wlat o|e achaỽs. Y balch o|r ỻan+

nerch a|dywaỽt anwaret idaỽ y neb a|ethrotto milỽr da y wrth

y arglỽyd. ac yr na|bo laỽnslot yma na dywet ti amdanaỽ ef y

peth nys|dylyych. kystal y kafas ỻys arthur glot ac enryded o+

blegyt laỽnslot ac oblegyt y grymussaf oc yssyd yn|y ỻys. ac o+

ny bei laỽnslot yndi agatvyd ef a vydei waeth y chlot noc y ma+

e. ac nyt oes yn hoỻ vrytaen milỽr rymussach na mỽy y argys+

sỽr ar baỽp no laỽnslot. ac o char y brenhin dydi na|wna di idaỽ

efo gassau y wyr. kanys y|mae ryỽ pedwar|gỽyr neu bump pei

as|coỻei ef o|th achaỽs di. ny chaffei ef vyth o|th blegyt ti eu kys+

tal ỽy. Laỽnslot a|vu yn gỽassanaethu arthur yr ys|talym. a|gỽ+

eỻ vu laỽnslot idaỽ efo no thydi. ac os|brenhin claỽdas a ryuela

ar arthur o achaỽs laỽnslot. ef a eỻir godef hynny. kanys y mae

y arthur o|vilwyr da mỽy noc y vrenhin o|r|byt. 

D ywedut y mae yr ymdidan yma y ỻidiassei y balch

ỽrth ˄vriant a briant ỽrthaỽ ynteu. pany bei vot y brenhin yno

yr hỽnn a dorres yr ymdidan yryngthunt. Pan|wybu y bren+

hin daruot y laỽnslot oruot ar magdalans a|ỻad kanmỽyaf y

wyr. ef a|anuones kennadeu y erchi idaỽ dyuot dra|e|gevyn. a

phan|gychwynnaỽd laỽnslot ar vedyr dyuot. ny bu hyfryt gan

y|wlat. a dyuot a|oruc ef hyt att y brenhin. a chỽbyl o|r ỻys a

vuant lawen ỽrthaỽ. kanys karedic oed gan baỽb. Rei a dyw+

aỽt idaỽ y chwedleu y ỽrth brenhin claỽdas. a|r|parableu a|dyw+