LlGC Llsgr. Peniarth 12 rhan ii – tudalen 52v
Ystoria Lucidar
52v
y darỻeir yn|diodeifyeint yr arglỽyd. ual yd ymdangosses y|kyth+
reul y wreic pilatus. y erchi idi na|dihenydyit iessu. kanys
ef a|wydyat y koỻei ef y vreint a|e vedyant o hynny aỻan. ~
Gỽeitheu ereiỻ y|gan dyn e|hun. megys yd|ymdengys idaỽ drỽy
y hun yr|hynn a|welo neu a|glywo neu a vedylyo o·dieithyr y
hun. discipulus Bendigedic vo geir duỽ a|uenegis y mi y|saỽl gyfri+
nacheu hynn. a hynny drỽy dy eneu di. ~ ~ ~ Discipulus
P Ei beidyỽn i y ovyn ytt yr aỽr·honn. mi a|vynnỽn glyw+
et peth am yr angkrist. Magister Yn ỻawen. yr|angkrist ym|ba+
bilon uaỽr y genir. o|buttein o|genedyl dann. ac a|gyflennwir
o gythreulyeit yng|kroth y vam. a|hudolyon a|e magant y|ngho+
ziaim. ac ef a|vyd arglỽyd ar yr|hoỻ|vyt. ac a|darestỽng yr
hoỻ dynaỽl berson idaỽ o bedwar|mod. Yn gyntaf y|darestỽng
y bonhedigyon. o olutoed y|rei a|vydant amyl idaỽ ef. kanys
pob sỽỻt kudyedic a|vyd amlỽc idaỽ. O|r eil mod yd ostỽng y
tlodyon idaỽ rac y ovyn. kanys y creulonder mỽyaf a|wna
ef y|r neb a gretto y duỽ. O|r trydyd mod ef a|dwyỻ ac a|darestỽng
yr ysgolheigyon idaỽ o|e doethineb a|e huolder. kanys ˄ef a|wybyd
yr hoỻ geluydodeu a|r ysgruthyr yn vyuyr. O|r pedweryd mod
ef a|dwyỻ y creuydwyr o arwydyon a|gỽyrtheu. kanys ef a|wna
anryuedodeu aryneigus megys peri tan o nef y losgi rac y
vronn ef y neb a vo yn|y erbyn. a|chyuodi y meirỽ y rodi tys+
dolyaeth idaỽ; discipulus A|e kyvyt ef ỽyntỽy yn wir. Magister Nac ef na+
myn kythreul o|e drycweithretoed. a gyrch y myỽn corff dyn
emeỻdigedic. ac a|arwed hỽnnỽ ymdanaỽ. a|dywedut trỽy+
daỽ megys y gỽelit y vot yn vyỽ. herwyd ual y dywedir
Geuaỽc vyd y hoỻ weithretoed yn|y hoỻ wyrtheu a|e arỽydon.
| « p 52r | p 53r » |