LlGC Llsgr. 3036 (Mostyn 117) – tudalen 199
Brut y Brenhinoedd
199
yd oed ynt uelly diwarnaỽt. nachaf Gillamỽri
vrenhin iwerdon a llyghes anueitraỽl y meint gan+
taỽ. yn dyuot yn porth yr genedyl druan poenedic
yd oedit yn| y guarchae. Sef a| wnaeth arthur ymadaỽ
ar yscotteit ac ar ffichteit Ac ymchoelut eu harueu
yn| y gỽydyl. Ac eu llad heb trugared. Ac eu kymhell
ar| ffo. A guedy ffo y gỽydyl; ymchoelut a oruc arthur.
ar yr yscotteit ar ffichteit y vynnu eu dileu hyt
ar vn. Ac val yd oed guedy ymrodi y greulonder
yn erbyn y pobyl honno. nachaf escyb y truan wlat
honno a|e hoffeireit a|e hathrawon a|e hyscolheigon.
yn troet noeth ac escyrn y seint ac a chrogeu ga+
ntunt yn dyuot y wediaỽ trugared arthur dros
atlibin y truan pobyl vonhedic honno A gue+
dy y adoli ar tal eu glinyeu; adolỽyn idaỽ ga+
du udunt y ran vychan a oed gantunt o|r yn+
ys y arwein tragywydaỽl geithiwet y danaỽ
ynteu. A chyffroi a wnaeth arthur ar warder a
thrugared. A rodi yr| gỽyrda seint hynny eu hadolỽyn
A Gwedy daruot hynny. sef a| wnaeth hywel
vab emyr llydaỽ. edrych ansaỽd y llyn. A ry+
uedu y saỽl auonoed a deuei idaỽ. Ac ny redei o·ho+
naỽ namyn vn. Ar saỽl ynys ar saỽl garrec ar
saỽl nyth eryrot. Sef a| wnaeth arthur dywedut
ỽrthaỽ bot llyn arall yn| y wlat honno a oed ryued+
ach no honno. Sef oed y hansaỽd. Vgein troetued
a oed yn| y hyt. Ac vgein yn| y llet. A phump yn| y
| « p 198 | p 200 » |