LlGC Llsgr. Peniarth 11 – tudalen 10r
Ystoriau Saint Greal
10r
y wledyd ereiỻ dieithyr o|r ỻeoed ny deuy vyth onyt duỽ
a|th denuyn. Arglỽydes heb ynteu mi a|deuaf o|r byd da gan
duỽ yn|gynt noc y tebygy|di. Och duỽ heb hi nyt ydiỽ vyng
callon i yn|gadu hynny. arglỽydes heb ef mivi a|af ragof gan
dy gennyat ti. Laỽnslot heb hitheu drỽy vyng|kennyat
i nyt aut ti vyth. Eissyoes kanys ydiỽ val y mae reit
yỽ ytti vynet dos yn|enỽ duỽ. ac yng|keitwadaeth yr hỽnn
a|diodefaỽd y boeni ar brenn y groc yr rydhav pobyl adaf
o angheu tragywydaỽl. a phoet euo a|th danuono drache+
vyn. Poet veỻy y bo heb y laỽnslot. Yna y kychwynnaỽd
laỽnslot y ỽrth wenhỽyuar. ac nyt heb dolur a|thristit. A
phan doeth ef y waeret. yd oed baỽp gỽedy esgynnv ar eu
meirch. heb lesteir o|r byt arnadunt onyt y aros ef. ac yn+
teu a|esgynnaỽd ar y varch. ac arthur yna a|doeth att gala+
ath. yr hỽnn a|oed yn kychỽyn heb daryan. ac a dywaỽt
ỽrthaỽ. A|vnbenn heb ef. ef a|welir y mi nat tec ytti ac
nat hard dy welet yn kychwyn heb daryan megys dy ge ̷+
dymdeithyon. arglỽyd heb ynteu. ny dygaf|i vn daryan yny
hanuono duỽ im o|damwein. megys y danuonaỽd y cledyf
hỽnn. Gan hynny heb yr arthur porth vo duỽ itt. Ac ar
hynny kychwyn o|r ỻys a|wnaethant paỽp ual y gilyd. a
hynny dan wylaỽ a|diruaỽr dristit ual nat oed ryued kanys
ny wydyat neb onadunt pa damwein a|e dygei. A gỽedy
eu|dyuot y|r fforest nessaf a|oed attunt. ỽynt a safassant
yn ymyl croes. Ac yna y dywaỽt gỽalchmei ỽrth arthur.
arglỽyd heb ef digaỽn y doethost di. ac ymchoel drachevyn
| « p 9v | p 10v » |