LlGC Llsgr. Peniarth 11 – tudalen 17v
Ystoriau Saint Greal
17v
ac yna melian a|dywaỽt. Arglỽyd heb ef ti a|m gỽnaethy ̷+
ost i yn varchaỽc urdaỽl. a|duỽ a|dalo itt. a|thi a|wdost ar+
glỽyd. pỽy bynnac a|wnel marchaỽc urdaỽl. ef a|dyly roi
idaỽ y rod gyntaf a archo idaỽ o|r byd kyfyaỽn. Gỽir a|dyw+
edy di heb y galaath. Arglỽyd heb ynteu yr keissyaỽ rod y
gennyt y dywedeis i. Dywet titheu heb y galaath pa ryỽ
rod yỽ honno. a|phei·ron vyg|gorthrymu o·honei ti a|e kef+
fy. Duỽ a|dalo it arglỽyd heb·y melian. nyt archaf i dim
o·nyt vyng|gadel yn dy gedymdeithyas yn y keis hỽnn yny
gyfarffo ryỽ anryuaỽt* a|ni. Ti a geffy hynny yn ỻaỽen heb+
y galaath. ac yna esgynnv ar eu meirch a|wnaethant a
chychwyn o|r uanachlaỽc. a marchogaeth beunyd o|r wyth+
nos honno. ac ef a|damchweinyaỽd udunt duỽ ỻun·gỽeith
dyuot hyt yn ymyl croes a|oed yng|kyssỽỻt dỽy|fford. ac ym+
penn y groes yr|oedynt ỻythyr yn dywedut. O chỽychỽi
varchogyon urdolyon anturyus. y rei yssyd yn|keissyaỽ
anturyeu a ryfedoeu* weldy yma dỽy|fford. vn ar y|ỻaỽ deheu
a|r ỻaỻ ar y ỻaỽ assỽ. ac yr ỽyf yn|gorchymyn nat el neb y|r
assỽ. o·ny byd gỽr da. kanys ef a|r aỻei idaỽ ymgyfyrgoỻi
yn ehegyr. A|phan|weles melian y ỻythyr hỽnnỽ. ef a|dy+
waỽt ỽrth galaath. Arglỽyd heb ef gan dy gennat miui
a|af y|r|fford ar assỽ. Goreu y kynghorỽn itt heb y galaath
gadel ymi vynet. Na adaf o|m|bod heb·y melian. kanys o|r
kyferuyd antur calet a myvi yn|y fford os myui a|dieinck
ef a|adnabydir beth vỽyf yn anghenn ae da ae|drỽc. Dos
ditheu yn ỻawen heb y galaath. a|duỽ a|th diangho rac drỽc.
| « p 17r | p 18r » |