LlGC Llsgr. Peniarth 18 – tudalen 43r
Brut y Tywysogion
43r
gỽynn. a meuryc abat y|cỽm|hir. Y ulỽydyn racỽy+
neb am·gylch y|garaỽys y|deuth patriarch caerussalem
hyt yn lloegyr y eruenneint nerth y|gann y brenhin
rac distryỽ o|r Jdeỽon ar sarassinyeit holl gaeru+
salem. A chyt ac amylder o uarchogyon a|phedyt.
yd|ymhoelaỽd dracheuen y gaerusalem. Yn|y ulỽy+
dyn honno dyỽ calan mei y|sumudaỽd yr heul y|lliỽ.
Ac y|dyỽat rei uot arnei diffyc. Yn|y ulỽydyn hon+
no y|bu uarỽ dauid abat ystrat flur. Ac y|bu uarỽ
hyỽel ap ieuaf arglỽyd arỽystli. Ac y|cladỽyt yn
anrydedus yn ystrat flur. Ac odyno y|bu uarỽ einon
ap kynan. Y ulỽydyn racỽynep y|bu uarỽ lucius
bap. Ac yn|y le yd vrdỽyt y|trydyd urbanus ynn
bap. Yn|y ulỽydyn honno amgylch mis gorffennaf
y|daeth couent ystrat flur hyt y redynaỽc velen
ygỽyned. Ac yna y|bu uarỽ pedyr abat y|dyfryn
gloeỽ. Ac yna y|llas cadỽaladyr ap rys yn gyhoed+
daỽc yn dyuet. Ac y|cladỽyt yn|y ty gỽyn. Yn|y ulỽy+
dyn honno y|bu uarỽ ithel abat ystrat marchell
Ac yna y|llas yỽein ap madoc. gỽr maỽr y|uolyant
kanys cadarn oed. a|thec. a charedic a|hael
ac adurn o|voesseu da. y gann deu uab yỽein kyfe+
ilaỽc. nyt amgen gỽenỽynỽyn a|chadwallon. a
hynny drỽy nosaỽl urat a|thwyll yg|karec oua.
Ac yna y|delit llywelyn ap cadỽallaỽn yn enỽir y|gann y
vrodyr. ac y|tynnỽyt y lygeit o|e|benn. Ac yna y
| « p 42v | p 43v » |