LlGC Llsgr. Peniarth 32 (Y Llyfr Teg) – tudalen 32
Llyfr Iorwerth
32
kynnut. ysgyren a|dynho yn dilesteir y ar y march
a|e laỽ ar y porth. Ef a|dyly pedeir keinyaỽc o bop
karcharaỽr y kaeher y porth arnaỽ. Ef a|dyly tyn ̷+
nu crỽyn yr aniueileit. nyt amgen y gỽarthec
a ladher yn|y ỻys. ac eu kadỽ yny ranher. ac idaỽ
ynteu y daỽ keinyaỽc o bop un. Ef a|dyly o|r anre ̷+
ith voch a|del trỽy y porth hỽch a|aỻo ef herỽyd
y gỽrych y drychafel a|e vn ỻaỽ. yny vo kyfuch
y thraet a thal y lin ef. Y ỻỽdyn diwethaf a|del
o|r anreith odef trỽy y porth ef bieu. Ef a dyly
vot yn righyỻ ar y vaertref. Ef a dyly pedeir keinyawc.
o bop amobyr a|del o·honei. Ef a dyly gỽyssyaỽ
gỽyr y vaerdref y weith. Ef a|dyly pedeir keinyawc. o bop
dirỽy a chamlỽrỽ arnadunt. Ef a dyly gỽneuthur
negesseu yn ryd yn|y ỻys oỻ. Ef a dyly cadit y
caỽs a boppo. Ef a|dyly arlỽyaỽ y ỻys o beri gỽeỻt
a chynneu tan. Y naỽd yỽ cadỽ y dyn a|wnel y
cam yny el y penteulu o|e letty trỽy y porth. a|r
penteulu a|dyly y dỽyn yn|diogel. Y sarhaet yỽ
chwe|bu a chweugeint aryant. y werth yỽ chỽe
bu a chweugein mu.
C hwechet yỽ y gỽylwr. Ef a dyly y dir yn ryd
a|e wisc pressỽyl. a|e archenat. a thorth a|e
henỻyn yn|y vore·vỽyt. Ny dyly gỽylyaỽ namyn
o|r pan elher y gyscu yny vo dyd. Ef a|dyly kyscu y
dyd. ac na wnel dim heb y obyr. Rei a dyweit y
| « p 31 | p 33 » |