Caergrawnt, Llsgr. Coleg y Drindod O.7.1 – tudalen 24v
Llyfr Blegywryd
24v
tri dieu yn wastat trỽy awel eglur
dyd y geissaỽ lle. a dyd y vudaỽ. A dyd
y orffowys. Y neb a gaffo heit ar tir
dyn arall; pedeir keinhaỽc a geiff ef y
perchen y tir. or myn ynteu yr heit.
AElodeu unwerth y dyn ynt y rei
hyn. dỽy laỽ. deu troet. deu lygat.
deu glust. dỽy ffroen yn lle un aelaỽt.
dỽy weus. whe bu a wheugeint ary+
ant yỽ gỽerth pob vn o hynny. Or try+
chir clust dyn ymdeith. a chlybot or
dyn arnaỽ mal kynt. dỽy vu a deu
vgeint aryant a tal. Gỽerth bys dyn;
buch ac vgeint aryant. Gỽerth y
vaỽt; dỽy uu a deu vgeint aryant.
Keilleu; kymeint yỽ eu gỽerth a gỽerth
yr aelodeu vry oll. Tauaỽt e hunan;
kymeint yỽ y werth a gỽerth yr ael+
odeu vry oll. Sef a tal holl aelodeu
dyn pan gyfriffer y|gyt. ỽyth punt.
a phetwar vgein punt. Pedeir ar
hugeint aryant yỽ gỽerth gỽaet pob
ryỽ dyn. Dec ar|hugeint vu werth
gỽaet crist. Ac anheilỽg y gỽelat uot
gỽaet duỽ. A gỽaet dyn yn vn werth.
| « p 24r | p 25r » |