LlGC Llsgr. 3035 (Mostyn 116) – tudalen 162v
Brut y Tywysogion
162v
ef yd aruoỻei yn ỻawen. a gỽedy clybot o ruffud vab rys hyny
ef a|hỽel y vraỽt a aethant attaỽ. Yr hỽel hỽnỽ a vuassei yg
charchar ernỽlf uab rosser Jarỻ casteỻ baldwin yr hỽn y
rodassei wilim vrenhin idaỽ kyfran o gyfoeth rys vab teỽdỽr
ac yn|y diwed y diaghassei yr hỽel hỽnnỽ yn an·afus gỽedy
trychu y aelodeu o|r karchar. Ac yna yd aruoỻet ỽynteu
ac ereiỻ gyt ac ỽynt yn hegar y gan ruffud vab kynan.
Ag yg|kyfrỽg hyny gỽedy clybot o|r brenhin mynet gruffud
vab rys at ruffud vab kynan. anuon kenadeu a|wnaeth at
ruffud vab kynan y erchi idaỽ dyuot attaỽ. ac vfud vu ruffud
y vynet at y brenhin. ac megys y|mae moes y|freinc tỽyỻaỽ
dẏnẏon drỽy edewidyon a·daỽ ỻawer a oruc henri vrenhin
idaỽ o chymerei arnaỽ daly gruffud vab rys. ac anuon yn
vyỽ attaỽ. ac ony aỻei y daly y lad ac anuon y ben idaỽ. ac
ynteu drỽy adaỽ hẏnẏ a ymchoelaỽd y wlat. ac yn|y ỻe go+
fyn a oruc py le yd oed ruffud vab rys yn trigyaỽ. a mene+
gi a|wnaethpỽyt y ruffud vab rys dyuot gruffud ap kynan
o lys y brenhin a|e geissaỽ ynteu yn|y ewyỻus. ac yno y dy+
uaỽt rei ỽrthaỽ a oedynt yn trigyaỽ gyt ac ef drỽy e+
wyỻus da gochel y gedrychaỽlder yny ỽyper py for* y ker+
do y chwedyl. ac ỽynteu yn dywedut hyny na·chaf vn
yn dyfot. ac yn dywedut ỻyma varchoogyon yn dyfot
ar vrys. a breid yd aethoed ef dros y drỽs na·chaaf y
marcho* yn dyuot y geissaỽ ac ny aỻaỽd amgen no chyrchu
eglỽys aber daron ar|naỽd. a gỽedy clybot o ruffud vab
kynan y dianc y|r eglỽys anuon gỽyr y|tynu ef o|r eg+
lỽys aỻan. ac ny adaỽd escyb a henafyeit y wlat hyny
rac ỻygru naỽd yr eglỽys. A gỽedy y eỻỽg o|r eglỽys ef
| « p 162r | p 163r » |