LlGC Llsgr. Peniarth 11 – tudalen 164r
Ystoriau Saint Greal
164r
drein y varch y|r ỻaỽr. Ac ar y cỽymp hỽnnỽ torri y vord+
wyt. A|r|chwedleu|hynny a|aeth att arglỽydes y casteỻ. a dywe+
dut idi vot milỽr aỻan yn|ỻad y marchogyon urdolyon. A
hitheu a|doeth yno a|dwy o|e ỻaỽ·vorynyon gyt a|hi. ac a ar+
ganuu laỽnslot yn mynnu gorffen ỻad y marchaỽc araỻ.
a vnbenn heb hi ỽrth laỽnslot pỽyỻa ychydic ac na lad y|gỽr. a
disgyin* y ymdidan a|mi. Arglỽydes heb·yr vn o|r morynyon. mi
a|e hatwaen ef. laỽnslot dy lac yỽ. Yna disgynnu a|oruc ef a|dyuot
geyr bronn yr arglỽydes. a unbennes heb ef. beth a|reyngk
bod ytti. Mi a|vynnaf heb hi dyuot ohonat y|m casteỻ i y
lettyu heno. ac y wneuthur iaỽn ym dros y kewilyd a|r|mi+
leindra a|wnaethost. Arglwydes heb ef ny wneuthum i dim
kewilyd eyrmoet. ac nys gỽnaf vyth. Eissyoes dy varcho+
gyon di a|ymyrrassant ar gewilyd maỽr. pan vynnynt
dwyn baryfeu gỽyr dieithyr y ganthunt y dreis. Mi a|vad+
euaf ytt a|wnaethost ym heb hi drỽy amot dy dyuot titheu
y lettyu heno ygyt a|mi. Arglỽydes heb·y laỽnslot ny myn+
naf i gael dy anuod di dros wneuthur dy ewyỻys yn gyn+
taf. Yna yd aeth ef y|r casteỻ gyt a|hi. a|pheri dỽyn y varch
yn|y ol. a hitheu a|beris dwyn y marchaỽc urdaỽl y|myỽn o|e
amdoi. a gorchymyn medeginyaethu y ỻaỻ a|oruc hi. A
pheri tynnv y arueu y|am laỽnslot. a|dỽyn gỽisc aduwyndec
idaỽ o|e gỽisgaỽ. a|dywedut ỽrthaỽ y gỽydyat hi pa vn oed|ef.
Tec a|digrif yỽ gennyf|i hynny heb·y laỽnslot. ac yna y eisted yd
aethant ac y vỽyta. ac y·gyt a|r anrec kyntaf y|doethant ~
marchogyon urdolyon y rei a|daroed torri eu|dỽylaỽ. ac a ̷
| « p 163v | p 164v » |