LlGC Llsgr. Peniarth 11 – tudalen 16r
Ystoriau Saint Greal
16r
y bed. ac yndaỽ ef a|welei marchaỽc marỽ yn|aruaỽc o bob
arueu. ac ef a|erchis y|r mynach dyuot y edrych yr hynn a|oed
yn|y bed. Ac ynteu a|doeth. ac a|dywaỽt bot yn reit bỽrỽ y corf
odieithyr y vynnwent. kanys y tir a|oed uendigedic a|chysse+
gredic. ac am hynny na aỻei y|tir ymgytuot a|r corff ysgym+
mun hỽnnỽ. Ac yna y kymerth y myneych ereiỻ y corff ac
y bỽryỽyt odieithyr y uynnwent. ac yna galaath a|ovynnaỽd
y|r manach a|e dugassei ef yno a|wnathoeth* ef kỽbyl o r hynn
a|dylyei y|wneuthur. Gỽnaethost arglỽyd heb ef na|chlywir
vyth weithyon dim y|ỽrth y ỻef. Y·rof a|duỽ heb y galaath. ry+
ved iaỽn yỽ gennyf beth a|arỽydocaa yr anryuedodeu hynn.
Mi a|e dywedaf itt heb y manach. ac yna dyuot a|orugant o|r
vynnwent y|r eglỽys yn|y ỻe yd erchis galaath y|r ysgỽier gỽy+
lyat y nos honno. ac auory heb ef mi a|th|wnaf yn varcha+
ỽc urdaỽl. ac ueỻy y gỽnaeth ynteu. A|r myneych a|gyme+
rassant galaath ac a|e|dugassant y ystaueỻ dec a|e|diarchenu
a|orucpỽyt. ac eisted a|orugant ar wely aduỽyndec. Ac yna y
manach a|o·vynnaỽd idaỽ a vynnei dywedut beth a arỽydoc+
kaei yr anturyeu a|orfennassei ef yno. Mynnaf dan y bỽyth
heb y|galaath. Yn|y bed racko heb ef yr oed tri|pheth a|eỻir
eu|dỽyn ar gyffelybrỽyd. Nyt amgen. kyntaf yỽ y maen
kalettrỽm nyt oed haỽd y dyrchafael yr hỽnn a|oed yn kud+
yaỽ y korff. Yr|eil oed y korff. yr hỽnn a|oed reit y|symut o|r
ỻe yd oed. Y trydyd oed y ỻef gỽennwynic estronaỽl. o|r acha+
ỽs y koỻei baỽp y nerth a|e gof a|e synnỽyr o|r|a|e clywei. Y
tri|pheth hynn yssyd reit eu|dỽyn ar|gyffelybrỽyd. nyt amgen.
| « p 15v | p 16v » |