LlGC Llsgr. Peniarth 11 – tudalen 60r
Ystoriau Saint Greal
60r
na aỻei valchder dyuot y·ryngthunt. Ac yna y teirỽ a|dywedas+
sant. Aỽn y geissyaỽ porua a|uo gỽeỻ no honn. kystal yỽ hynny
a milwyr y vort gronn a|dywedassant. aỽn y geissyaỽ seint
greal yn y ỻe y mae y|bỽyt y bỽyt ysprydaỽl yr hỽnn yd envyn
yr yspryt glan ef y|r neb a geissyo o ras eisted ar tabyl seint
greal. Yna ỽynt a|gychwynnassant o|r ỻys ar hyt y glynn.
ac nyt ar|hyt y weirglaỽd. Pan aethant o|r|ỻys. nyt aethant
ỽy y gyffessu megys y dylyei y neb a vynnei vynet y wassa+
naeth iessu grist. ac nyt aethant y uvuddaỽt ac anmyned yr
honn a gyffelybỽyt y|r weirglaỽd. namyn mynet a|wnaethant
ar hyt y glynneu a|r|fforestyd dyrys o vieri. a|drein. Y rei a
eỻir eu kyffelybu y uffern. A|phan|doethant y teirỽ drachefyn
ny doethant yn gỽbyl. a|r rei a|doeth a|oedynt ueirỽ o newyn
ac yn|gulet ac na aỻynt sefyỻ ar eu traet. kystal yỽ hynny ac
na|deuant y kedymdeithyon gỽbyl adref vyth. kanys rei o+
honunt a|lad y|gilyd. a|r rei a|del adref ny wyr|duỽ udunt aỻel
sefyỻ ar eu traet rac eu culet. nyt amgen noc rac eu pechodeu
yny syrthyont ym|perued uffern. O|r tri heb uann arnunt y
tric deu. ac y|daỽ vn drachefyn. kystal yỽ hynny ac o|r|tri march+
aỽc urdaỽl da. y daỽ vn y|r ỻys. a|gỽybydỽch chỽi nat yr chwant
y bỽyt o|r rastyl y daỽ ef. namyn yr menegi ysprydolder y bỽyt
nefaỽl a|goỻassaỽch chỽi o achaỽs aỽch pechodeu. y deu ereiỻ ny
deuant. kanys yr aỽr yd archwaedont ỽy yr ysprydaỽl vỽyt. nyt
ymadaỽant ac ef vyth. Y geiryeu diwethaf o|th breudwyt. nyt
ysponaf yỽch dim o·honunt. kanys agatuyd ny bydei hoff
gennwch. Arglỽyd heb·y gỽalchmei duỽ a|dalo ytt am a|wnaeth+
ost.
| « p 59v | p 60v » |