LlGC Llsgr. Peniarth 18 – tudalen 26v
Brut y Tywysogion
26v
darestyghỽyt eluael yr eilỽeith yr freinc. Y ulỽyd+
yn racỽyneb y delis hu o mortmer. Rys ap hoỽel
ac y gỽarchaeaỽd myỽn karchar ỽedy llad rei o|e ỽyr
a|daly ereill. ac yna y diffeithaỽd hywel ap ywein
a|chynan y vraỽt. A gỽedy bot brỽydyr arỽdost a|ch+
ael onadunt y uudugolyaeth yd ymhoelassant dra+
chefen a|diruaỽr anreith gantunt. Ac yna y|doeth gil+
bert Jarll vab gilbert arall y|dyuet ac y darestygaỽd
y|ỽlat ac yd adeilaỽd gastell caer vyrdin a|chastell arall
y mab udrut. y ulỽydyn racỽyneb y bu varỽ sulyen
richemarch Mab y sein padarn mab maeth yr eglỽys
a gỽedy hynny athro arbenic oed ac aeduet o geluy+
dyt ymatrodỽr dros y genedyl a dadleuỽr. kymroded+
ỽr hedychaỽl amrauaelon gynedloed. adurn o vrody+
eu eglỽyssolyon a|rei bydolyon. y decuet dyd o galan
hydref ỽedy kymryt Jachaỽl benyt ar y gyssegred+
ic gorff. a chymun corff crist ac oleỽ ac aghen. ac y+
na y llas Meuryc ap madoc ap ridit yr hỽn a|elỽit
Meuryc tybodyat drỽy vrat y|gan y|ỽyr e|hun. ac y+
na y llas Meredud ap Madaỽc ap Jtnerth y gan hu o
mortmer. yn|y ulỽydyn honno y|gỽeresgynaỽd cad+
ell ap Gruffud castell dinỽeileir. yr hỽnn a|ỽnaethoed
gilbert Jarll. ychydic ỽedy hynny y goruu ef a|hoỽel
ap yỽein gastell caer vyrdin. drỽy gadarn amrysson
gỽedy llad llaỽer o|e gelynyon a|brathu ereill. ychy+
dic o|dydyeu ỽedy hynny y doeth yn deissyuyt dir+
| « p 26r | p 27r » |