Llsgr. Caerdydd 3.242 (Hafod 16) – tudalen 33
Meddyginiaethau
33
Araỻ yỽ; kymer sud y|polipodii. a|dot ỽrthaỽ. a iach vyd. Araỻ.
yỽ; kymer bybyr a|ryc a|ỻinhat. a wermot. a sych y rei hynny y+
gyt a gỽna bỽdyr a|dot arnaỽ. Py saỽl amryỽ gleuyt ys+
syd o graỽn; deu. tỽym ac oer. a|r tỽym yssyd bericla o|r|deu
a|ffroeneu ehalaeth idaỽ. a|r|oer yssyd a ffroeneu kyuing
ac am hynny reit yỽ amryỽ vedeginyaetheu udunt. kanys
y gỽressaỽc yssyd reit y|vedeginyaethu a|phetheu oeruelaỽc
a|r oeruelaỽc a phetheu gỽressaỽc. Val|hynn y hyecheir yr
oeruelaỽc; kymer. sud y|lancelle. a gỽynn·wyeu. a blaỽt ryc
a gỽna does a|dot ar|y dolur a iach vyd. a gat y drigyaỽ ỽrth+
aỽ yny|dygỽydo e|hunan y ỽrthaỽ. ac ueỻy gỽna yny|el yn
iach. Rac y gỽressaỽc kymer. gann ryc. a mel gloeỽ a gỽna
deissen a dot yn dyỻaỽc ỽrthaỽ. A phan vo reit symut honno
a dot ỽrthaỽ araỻ. Rac yr un kyffredin; kymer garth a briỽ
yn van. a|gỽlych myỽn ỻeissỽ a wneler drỽy wenith. a berỽ
yn|da a dot ar|y dolur. nossweith a hanner dydgỽeith. ac y+
na tynn hỽnnỽ y ỽrthaỽ. a|golch y dolur a thrỽngk gỽr;
Ac yna edrych dy vot yn|dodi arnaỽ ef bỽdyr a|wneler
val|hynn; kymer esgyỻ gỽyd a thynn y garỽ y ỽrthaỽ. ac
yna ỻosc ỽynt. a gỽna bỽdyr a dot hỽnnỽ ar|y dolur. a dot
arnaỽ ynteu vlonec baed neu vlonec tỽrch. ac odyna dot
vn o|deil y|kaỽl arnaỽ. a chymer hengỽryf da a|wneler drỽy
wenith heb dim o heid yndaỽ nac vn yt araỻ. a|ỻanỽ o|r
kỽryf hỽnnỽ y|sten newyd. a dot halen yndaỽ ac arnyment
a|phyc. kymeint o|bob un o·honunt a|e gilyd. ac o|gỽyr
newyd mỽy noc|o|vn ohonunt. a|berỽ ygyt ỽynt yny
vo teỽ. ac odyna tynn y|r ỻaỽr ef a|gat y oeri. a gỽna blastyr
| « p 32 | p 34 » |