LlGC Llsgr. Llanstephan 27 (Llyfr Coch Talgarth) – tudalen 71r
Buchedd Dewi
71r
hynny duỽ maỽrth y dyd kyntaf o galan maỽrth y kymerth
Jessu grist eneit dewi sant ygyt a maỽr uudugolyaeth a|ỻeỽ+
enyd ac enryded. gỽedy y newyn a|e sychet a|e annwyt a|e la+
uur a|e dyrwest a|e gardodeu a|e vlinder. a|e draỻaỽt a|e brofedi+
gaetheu. a|e uedỽl am y byt. y kymerth yr engylyon y eneit
ef. ac y dugant y|r ỻe mae goleuni heb diwed. a gorffowys
heb lauur. a ỻewenyd heb dristyt. ac amled o bop ryỽ da. a
budugolyaeth a|chlaerder a|thegỽch. Y ỻe y mae molyant
rysswyr crist. ỻe yd ysgaelussir y kyuoethogyon drỽc. ỻe y
mae iechyt heb dolur. a Jeuengtit heb heneint. a thang+
nefed heb anuundeb. a gogonyant heb or·wacrỽyd. a cherdeu
heb vlinder. a|gobrỽyeu heb diwed. Y ỻe y mae abel y·gyt a|r
merthyri. ỻe mae enoc y·gyt a|r rei byỽ. ỻe y mae noe y·gyt
a|r ỻongwyr. ỻe y mae abraham y·gyt a|r padrieirch. ỻe y|mae
melchisedech y·gyt a|r offeiryeit. ỻe mae iob y·gyt a|r rei da
eu diodef. ỻe mae Moẏsen y·gyt a|r tywyssogyon. ỻe mae aa+
ron ygyt a|r esgyb. ỻe mae dauyd y·gyt a|r brenhined. ỻe mae ẏ+
saias ygyt a|r proffỽydi. ỻe mae meir y·gyt a|r gỽerydon. ỻe
mae pedyr y·gyt a|r ebystyl. ỻe mae paỽl ygyt a|gỽyr groec.
ỻe mae thomas y·gyt a|gỽyr yr india. ỻe mae ieuan y·gyt a
gỽyr yr asia. ỻe mae matheus y·gyt a|gỽyr iudea. ỻe mae lu+
cas ygyt a|gỽyr achaia. ỻe mae marcus y·gyt a|gỽyr alex+
andria. ỻe mae andreas ygyt a|gỽyr sithia. ỻe mae yr engyly+
on a|r archengylyon. cherubin a|seraphin. a|brenhin y bren+
hined yn yr oes oessoed. A M E N.
Ac ual y koffayssam ni dewi yn|y uuched e|hun a|e weithredoed
ar y|daear yma. veỻy y bo kanhorthỽyỽr ynteu ac y grymhao
| « p 70v | p 71v » |