LlGC Llsgr. Llanstephan 27 (Llyfr Coch Talgarth) – tudalen 78r
Ystoria Adda ac Efa
78r
aỻan o|r|dỽfyr. a mi a|th dygaf y|r ỻe y mae dy vỽyt yn
baraỽt. Pan gigleu eua hynny y gredu a|oruc a|myn+
et aỻan o|r dỽfyr. a|e chnaỽt hi a|oed yna kyn lasset a|r
ỻinos a|hynny o oeruel y dỽfyr. a phan aeth o|r|dỽfyr. ~
dy·gỽydyaỽ a|oruc hi y|r ỻaỽr. a|r angel drỽc a|e dyrchevis
y vyny ac a|e duc att adaf. A phan|weles adaf y kyth+
reul y dywaỽt ỽrthaỽ o lef uchel dan wylaỽ. Oia eua
oia eua. ae yr|aỽrhonn y mae aỽr dy benyt ti. pa delỽ
y|th dỽyỻỽyt ti trỽy yn gelyn ni yr hỽnn y|n peỻaỽyt
o lewenyd ysprydaỽl baradỽys o|e achaỽs. Pan gigleu
hi hynny ac adnabot mae eu gelyn ỽy oed ef. dygỽyd+
aỽ ar y daear megys marỽ a|wnaeth. a|e chỽyn a|e dolur
a|vu deudyblic idi yna. Adaf yna a|dechreuaỽd dywedut
ỽrth y elyn. Dywet ti gythreul pa achaỽs y ry·uely di
heb achaỽs arnam ni. a pha|beth a ovynny di ynni. pa
le y dugam ni dy ogonyant ti. pa le y parassam ni yt+
ti goỻi dim o|th enryded. pa achaỽs yr ỽyt ti y|n hymlit
ni ual hynn. Eu|gelyn kythreul yna a|dywaỽt. adaf
adaf vy hoỻ elynyaeth i a|m blinder. a|r dolur yssyd ar+
naf o|th achaỽs di y mae oỻ. kanys o|th achaỽs di y|m
gyrrỽyt i o|m gogonyant. ac y|m peỻawyt y ỽrth vyng
goleuat. kanys kyn·no hynny yd oedỽn. i. yn|y nef.
ac o|th achaỽs di y|m gyrrỽyt i y uffern. Yna yd at+
tebaỽd adaf. Beth a|wneuthum i. ytti heb ef. a pha
beth a holy di ymi. a minneu heb wneuthur drỽc
ytti eiryoet. a pha achaỽs yr ỽyt ti y|n hymlit ni. Yn
y lle yd attebaỽd y kythreul idaỽ. ny wnaethost di dim
| « p 77v | p 78v » |