LlGC Llsgr. 3035 (Mostyn 116) – tudalen 34v
Brut y Brenhinoedd
34v
megys gỽyalen vechan gan y hysgytweit vn weith.
Ac val yd oed vrutus diwarnaỽt yn aberthu y|diana
yn|y borthua y|disgynassei yndi nachaf y kaỽr hỽnỽ
yn dyuot ar y vgeinuet o|r keỽri ereiỻ ygyt ac ef.
Ac yn gỽneuthur creulaỽn aerua o|r brytanyeit.
Ac eu damgylchynu a|wnaeth y brytanyeit Ac eu
ỻad oỻ eithyr vn kaỽr maỽr hỽnnỽ a archassei
vrutus y|gadỽ y|welet ymdrech y·rygtaỽ a chorineus
kanyt oed dim digrifach gantaỽ no gỽelet y|ryỽ
gatwent honno Ac y ymdrech yd aeth corineus
a|r kaỽr a|phob vn onadunt a gymerth gafel ardỽrn
ar y|gilyd ac ymdrauodi a|gỽasgu a wnaeth corineus
y kaỽr attaỽ a|thorri teir assen yndaỽ. vn yn yr ys+
tlys deheu a dỽy yn yr ystlys asseu A ỻidyaỽ a wnaeth
corineus a drychafel y kaỽr ar y yscỽyd a chyrchu
pen|karrec vchel vch ben y|mor. A|bỽrỽ y|syrth hỽnnỽ
y ar y ysgỽyd drỽy yskithred kerryc yny vu yn dryỻ+
eu yny goches y|toneu gan y gỽaet ac yr hẏnnẏ
hyt hediỽ y gelwir y|ỻe hỽnnỽ ỻam y kaỽr. ~
A c yna gỽedy rannu o vrutus y teyrnas y·rỽg y
wyr ynteu. Y edrychỽys ynteu ỻe y bei deilỽg
gantaỽ y adeilat dinas yndaỽ. Ac y|doeth hyt
ar auon demys Ac yno y|kauas y|ỻe a vu adas gantaỽ
ỽrth adeilat. Ac yno yd adeilỽys dinas Ac y gelwis
ef troea newyd a|r enỽ hỽnnỽ a barhaỽys arnaỽ hyt
yn oes lud mab beli braỽt y gaswaỻaỽn vab beli
y gỽr a ymladỽys ac vlkessar amheraỽdyr rufein
A gỽedy kaffel o lud y vrenhinyaeth y kadarnhaỽys
ynteu y|dinas o geyryd a|thyroed anrydedus. Ac y
gelwis o|e enỽ e|hun kaer lud Ac o|r achaỽs hỽnnỽ
| « p 34r | p 35r » |