LlGC Llsgr. Peniarth 11 – tudalen 209v
Ystoriau Saint Greal
209v
yr adnabuant ỽy panyỽ ef a|oed yno. Ac ar hynt peri eu bedydyaỽ
a|wnaethant a chredu y|r drindaỽt ac y|r gret new·yd. ac y·gyt a
hynny o angheu yr iachaaỽd ef ỽy. kanys ovyn oed arnunt
y bydynt ueirỽ yn|eu pechodeu ac yn|y gamgret. Digrif vu
gan baredur welet y bobyl yn credu y|duỽ a meir o|e achaỽs
ef. Ac yna y vorwyn a|dywaỽt. arglỽyd heb hi digaỽn yd
ym ni yma. aỽn ymeith weithyon y orffen dy neges am yr
ormes vudyr. kanys po mỽyhaf a|arhoych. mỽyhaf y distriỽ+
a ynteu y wlat ac a|lad o dynyon. Yna ef a gymerth kennat
paỽb o|r casteỻ. y rei a|oed arnunt ouyn maỽr am·danaỽ rac
periclet y ỻe yr oed yn mynet idaỽ. ac a|dywedassant os ef a
oruydei ar uarchaỽc y dreic. na chafas gỽr o|r byt hỽnn antur
degach no honno. Yno gỽarandaỽ offeren a|oruc ef kyn y vyn+
et. a|phaỽp a|aeth yn|garedic y offrỽm yr anryded idaỽ ef. Y
vorwyn a|gerdaỽd o|r blaen yr honn a|wydyat y fford a|r|ỻe yd
oed marchaỽc y dreic yn cartrefu yndaỽ. a marchogaeth a|oruc+
ant yny doethant y ynys yr eliffantyeit. a marchaỽc y
dreic a disgynnassei dan vric oliwyden y eisted gỽedy daruot
idaỽ lad marchaỽc y arglỽydes y kylch eur. a|hitheu a|oed yn
eisted ar ffenestyr y chasteỻ ac yn edrych ar lad y marchaỽc
yr hynn a|oed dost genthi. ac yn dywedut. Oi a v|arglỽyd tec
a welaf|i vyth marchaỽc a|dialo ar y|ỻeidyr racko y draha. am
lad vyng|gỽyr a|diua vyng|gwlat ual hynn. ac ar hynny ar+
ganuot y uorỽyn a|oruc hi yn dyuot a|pharedur gyt a|hi. a
hitheu a|griaỽd arnaỽ ef ac a|dywaỽt. Tydi varchaỽc heb
hi o·ny thebygy vot ynot o|nerth a|chedernit mỽy noc myỽn
| « p 209r | p 210r » |