LlGC Llsgr. Peniarth 11 – tudalen 63r
Ystoriau Saint Greal
63r
hynny ti a|dylyut vot yn|da. Arglỽyd heb·y bỽrt ỻawer
mab o vam drỽc ac o tat drỽc a|uv da. ac am hynny ef a
welir y mi nat ỽrth y uam na|r tat y kerda y mab. na+
myn ỽrth y gallon a vo yndaỽ. Ac ueỻy dan ymdidan
y kerdassant yny doethant hyt yn ymyl ty y meudwy.
a|r meudwy a|erchis idaỽ disgynnu a thrigyaỽ y nos honno
ygyt ac ef. a thrannoeth ef a|rodei idaỽ y kynghor goreu
o|r a|wypei. Ac yna bỽrt a|disgynnaỽd. ac ysgolheic o|r ty
a|gymerth y varch ac a|e kyweiryaỽd. ac odyna a|e kym+
horthes ynteu o|diosc y arueu. ac odyna y gỽr da a|erchis
y vỽrt dyuot y warandaỽ gosper. ac ueỻy y goruc ynteu.
a|gỽedy gosper ỽynt a|aethant y vỽyta bara a|dỽfyr. a|r
meudỽy a|dywaỽt mae ar yr ryỽ vỽyt hỽnnỽ y dylyynt
y marchogyon urdolyon da porthi eu|kyrff. ac nyt ar ve+
lysvwyt a|ffermeu y rei a barant y|r gỽr a|r wreic bechu
yn|odinabus ac yn varwaỽl. ac myn duỽ heb ef pei teby+
gỽn J wneuthur o·honat ti yrof|i beth. mi a|e harchỽn ytt.
A bỽrt a|ovynnaỽd idaỽ beth oed hynny. Myn duỽ heb
ynteu peth a|weỻao yn vaỽr ar dy eneit. ac a|gynhalyo yn
da|digaỽn dy gorff. Minheu a|e gỽnaf yn ỻawen heb·y bỽrt.
Je heb y gỽr minneu a|orchymynnaf ytti na|bỽyteyỽch am+
gen vỽyt no hỽnn yny vych ar dabyl y seint greal. Beth a
wdost ditheu heb·y bỽrt a|vydaf inheu vyth yno. Gỽnn heb
ynteu y bydy di. ti a|deu ereiỻ o gedymdeithyon y vort gronn.
Gan hynny heb·y bỽrt minheu a rodaf vyng|kret megys
marchaỽc urdaỽl kywir. na|bỽytaf amgen vỽyt yny vỽyf
yno.
| « p 62v | p 63v » |