LlGC Llsgr. Llanstephan 27 (Llyfr Coch Talgarth) – tudalen 39v
Ymborth yr Enaid
39v
hỽnn. Jessu. ~ vn mab meir wyry ~ Ac yna o|chlywy ryỽ
ganueu digrifyon per araflef. gỽybyd mae y engylyon ef
a|e canant. ac o|r gỽely ryỽ ganneitwenn wybren yn|deissyf+
yt yn kyflenwi dy holl olỽc a|th hoỻ gaỻon o annỽylserch tra+
gywydolder vywyt yn chwimỽth yn|disgleiryaỽ megys ỻuch+
eden. gỽybyd mae ef e|hun yn ysprydaỽl oruoledus gnaỽt+
older yssyd yno. ac yna dygynlut alỽ vyth iessu ~ vn mab
meir wyry. ~ yny syrthyo arnat per uarỽ·hun digrifdlos
o|r mynychyon berlewycuaeu a|dywetpỽyt uchot. Ac yna
o|r gỽely yn|y varỽ·hun honno megys hun araỻ ber araf+
ach no|r hun gyntaf yn|dyuot. gỽybyd dy vot odieithyr dy
gnaỽtolyaeth yn ysprydaỽl hun dwy·vrỽyt. ac yna o|daỽ
cof ytt rac per|digrifỽch yr hun honno galỽ o|th serchaỽl
vryt ar ~ Jessu. ~ yn dy vedỽl kynny eỻych y dywedut. Ac
yna o|r gwely dybygy di dy vot yn kaffel yn|yr hun honno
hun araỻ dribrỽyt a vo perach ac arafach y·gyt a|r ỻeiỻ. y+
na ymdyro oỻ y|r yspryt glan. a|r|weledigaeth a|welych yn hon+
no kywir vyd. kanys y gan yr yspryt glan y daỽ. ac nyt reit
y menegi y neb onyt y gyfrinachus gedymdeith o greuydỽr.
na bocsachu amdanei rac na del yr eilweith. a|r hun honno a
elwir hun uudugaỽl. kanys budugaỽl yỽ y chaffel. a bu+
dugaỽl yỽ y neb a|e kaffo. Yr amser pennaf y dylyych y cheis+
saỽ yỽ duỽ sadỽrn wedy hanner nos yn|lut ar y|dyd. neu
yng|kyfrỽng y nos a|r dyd gỽedy ry ymbaratoych kynno hyn+
ny o vnpryt a|gỽedieu duỽ gỽener a|duỽ sadỽrn. A thrỽy lan
gyffes ymrodi y|r|drindaỽt gyssegredic o nef. Ac odyna y|dyd
hỽnnỽ nyt amgen duỽ sul. kymer gymun corff crist. a|r nos
| « p 39r | p 40r » |