LlGC Llsgr. 3036 (Mostyn 117) – tudalen 58
Brut y Brenhinoedd
58
herwyd y warder ny mynnỽys ef bot y| meibon yn
diran o|r teyrnas namyn rodi y auarỽy lundein a| iar+
llaeth geint. Ac y teneuan iarllaeth kernyỽ. Ac idaỽ
ynteu e| hun coron y teyrnas.
AC yn yr amser hỽnnỽ megys y keffir yn istoria
guyr rufein. Guedy daruot y vl·kessar orescyn
freinc. A dyuot hyt ar lan y| mor ar| traeth Rỽyden.
A guedy arganuot o·honaỽ odyno ynys prydein. A gỽ+
ybot py tiroed a phỽy oed yn| y chyuanhedu. y| dywa+
ỽt pan yỽ vn genedyl oed wyr rufein a|r brytanyeit.
kanys o eneas yd hanhoedynt ỽy a|r| brytanyeit.
Ac eissoes o|m tebic neur deryỽ udunt digenedlu y
ỽrthym ni. kany ỽdant beth yỽ milỽryaeth ỽrth eu
bot y| myỽn eigaỽn odieithyr y byt yn pressỽylaỽ.
Ac ỽrth hynny mi a| tebygaf bod yn haỽd eu kymhell
y talu teyrnget heb ef y rufeinhaỽl amherodraeth.
megys y tal yr holl uyt. Ac eissoes heb ef iaỽn yỽ
anuon y erchi teyrnget udunt. kyn llafuryaỽ guyr
kymeint a guyr rufein y| eu kymhell. A rac codi pri+
af hen an hentat gan ellỽg guaet an kereint. A|r
ymadraỽd hỽnnỽ a dodes vl·kessar y myỽn llythyr.
Ac a anuones at kaswallaỽn vab beli brenhin y bry+
tanyeit. A phan datganỽyt y gaswallaỽn y llythyr.
sorri a wnaeth. Ac anuon llythyr ar vl·kessar trach+
efyn a oruc kaswallaỽn yn| y mod hỽn.
KAswallaỽn brenhin y brytanyeit yn anuon an+
nerch y vl·kessar. A ryuedu meint sychet a ch+
| « p 57 | p 59 » |