LlGC Llsgr. Peniarth 9 – tudalen 35r
Ystoria Carolo Magno: Chronicl Turpin
35r
*ac eu hyssigaỽ. Ac arganuot a oruc varsli yn ffo
a|y ymlit a oruc rolont a|y lad ac ny diegis vn
gỽr o wyr rolond o hyny o gyfran namyn rol+
ond y hun gỽedy y vrathu a phedeir gleif a|y
vriỽaỽ a mein a|y yssigaỽ. A phan gigleu beli+
gant hyny yr eil brenhin o|r pagannyeit dis+
greth varsli yn dygỽydyaỽ ffo a oruc ynteu ac
adaỽ y wlat. Tyodoric a baỽtwin a rei ereill
o|r cristonogyon oyd yn llechu rac ouyn y my+
ỽn llỽyneu ac ereill a adoyd yn ol charlys y
byrth yr yspayn. Ac neur daroyd y charlys
adaỽ a oyd dyrys a pherigyl o|r ffyrd a dyuot
yr diogelỽch heb ỽybot dim o|r a oyd yn ol.
A blinaỽ a oruc rolond gan bỽys yr ymlad
a chan rodi y dyrnodeu maỽr. A chymryt y
bratheu agheuaỽl a gaỽssei a dyuot velly a
oruc rolond drỽy dryssỽch a llỽyneu hyt y pen
issaf y byrth ciser. Ac yna y disgynaỽd ef y
ar y varch y dan bren ỽmbyr y myỽn gỽeir+
glaỽd dec a mayn marmor maỽr wedy y gy+
uodi yn|y seuyll yn ymyl y pren. a|thynnu y
gledyf a oruc o|y wein dỽrndard oyd y enỽ.
Sef oyd hyny dyro dyrnaỽt calet. A dywe+
dut a oruc ỽrth y gledyf val hyn o ymadrod+
yon dagreuaỽl. O|r cledyf teccaf a gloyỽaf a
gỽedussaf. y kyuartalaf y hyt a|y let y gỽyn+
af a|theccaf. y dỽrn o ascỽrn mor·uil ar groys
eureit yn|y deccau ac aual o|r beril teccaf ar
y dỽrn ar kenaỽl eur gỽrthuorussaf yndaỽ
The text Ystoria Carolo Magno: Chronicl Turpin starts on line 1.
| « p 34v | p 35v » |