LlB Llsgr. Ychwanegol 19,709 – tudalen 14r
Brut y Brenhinoedd
14r
genedyl y|piratas. a gvedẏ goruot onadunt hỽy
kẏmryt ỻawer o yspeileu y|piratas a|wnaethant. ac o +
dyna y|kerdassant dros auon malef yny doethant hyt
y mor·ytan. ac y bu reit vdunt yna o dolodi* bvẏt a diaỽt
mynet y|r tir oc eu ỻogeu ac anreithaỽ y|wlat a|wnaethant
o|r mor y gilyd. a gỽedy ỻenwi eu ỻogeu y doethant hyt yg
colofneu herkỽlf. ac yd ymdangosses y voruorỽyn vdunt a
dam·gylchynu eu ỻogeu ac y|bu agos ac eu sodi o gỽbyl. ac o+
dyna y doethant hyt y mor tyren. a|cher·ỻaỽ y mor hỽnỽ kavs+
ant pedeir kenedyl o aỻtudyon troea y|rei a|foassant y·gyt ac
antenor o troea. ac yn dywyssaỽc arnadunt corineus gỽr hy+
navs oed hvnv goreu y gygor o|r gvyr mvyaf y|nerth a|e levder
a|e gedernit. Pei ymdrechei a|chaỽr ef a|e byrei val y|mab ỻeiaf
a gvedy ymadnabot gỽrhau a wnaeth corineus y vrutus
a|r bobyl a oed gyt ac ef. a hỽnỽ ym|pop ỻe o|r y|bei reit vrth vr
a ganhorthỽyei vrutus. ac odyna y doethant hyt ym porth ly+
gerys yg gỽasgỽyn a bỽrỽ agoreu yno. ac yna y gorffoỽyssyssant
yn edrych ansaỽd y|wlat seith nieu.
A c yn yr amser hỽnnv yd oed goffar fychty yn vrenhin yg
gvasgvyn a|pheitaỽ. a gỽedẏ clybot o|hỽnnỽ disgynu estraỽn
genedyl yn|y|wlat anuon a|wnaeth attunt y vybot beth
a vynynt ae ryfel ae hedvch. ac ual yd oed genadeu goffar yn
dyuot y|kyuarfuant a|chorineus a deu·canvr gantav yn hely fo+
rest y brenhin a gofyn a|wnaethant pvy a ganhatyssei idav hely
forest y brenhin. kanys hen deuaỽt yv yr y dechreu na dylyei
neb hely forest y brenhin na ỻad y anyueileit heb y ganhyat
ac y dywaỽt corineus na cheissassei ef eiroet ganhat ar y|kyf+
ryỽ a hẏnẏ. ac yna sef a|wnaeth vn o|r kenadeu ymbert y|env.
| « p 13v | p 14v » |