LlGC Llsgr. 3035 (Mostyn 116) – tudalen 107r
Brut y Brenhinoedd
107r
let o| r brytanyeit hyny teỽhau eu toruoed a| wnaeth+
ant ỽy a| e ymlit ynteu Ac o| pop parth vdunt gỽneuthur
aerua Ac yn| y ỻe y dygỽydassant golgrim a baldỽlf
y vraỽt a ỻawer o vilyoed gyt ac ỽynt. A| phan welas
cheldric peri·gyl y getymdeithon yn| y ỻe heb annot
ymchoelut a oruc y·gyt a| r rei ereiỻ ar ffo. ~
A gỽedy kaffel o arthur y vudugolyaeth hono. ef
a erchis y| gadỽr jarỻ kernyỽ erlit y| saesson hyt
tra vryssyei ynteu y| r alban. kanys menegi a| r
daroed idaỽ yr dyfot y| fichteit a| r yscotteit y ymlad
a| chaer alclut y ỻe yd adaỽssei ef hỽel y| nei yn glaff
Ac ỽrth hyny y bryssyei ynteu yno rac kaffel y| gaer
arnaỽ. Ac odyna kadỽr tywyssaỽc kernyỽ a deg|mil ygyt
ac ef a ymlynaỽd y| saesson Ac nyt yn eu hol yd aeth
namyn achubeit eu ỻogeu yn gyntaf a oruc rac kaffel
o·nadunt diogelỽch nac amdiffyn o| r ỻogeu. A| gỽedy
kaffel eu ỻogeu ohonaỽ dodi a| oruc y| marchogyon ar+
uaỽc goreu a oed ar y| helỽ yndunt rac kaffel o| r saeson
ford vdunt os yno y| kyrchynt A gỽedy daruot kadarn+
hau y| ỻogeu veỻy. Ar vrys ymchoelut a oruc ar y| e+
lynyon ac eu ỻad heb drugared gan eilenwi gorchy+
myneu arthur ymdanadunt Y| rei o deudyblyc boen
a gywarsegit. kanys rei onadunt o er·grynedic kal+
onoed a| ffoynt y| r koetyd ac y| r ỻỽyneu Ereiỻ y| r my+
nyded a| r gogofeu y geissaỽ yspeit y achwanegu eu
hoedyl ac o| r| diwed gỽedy nat oed vdunt neb ryỽ
diogelỽch yr hyn a| dieghis onadunt yn vriỽedic ỽynt
a ymgynuỻassant hyt yn ynys danet A hyt yno
tywyssaỽc kernyỽ a| e hymlynaỽd gan eu ỻad Ac ny
orffoỽyssaỽd hyt pan las cheldric Ac eu kymell ỽyn+
teu oỻ y ỻaỽ gan rodi gỽystlon ~ ~ ~
| « p 106v | p 107v » |