LlGC Llsgr. 3035 (Mostyn 116) – tudalen 109v
Brut y Brenhinoedd
109v
gyon ereiỻ. ef a| vynaỽd talu eu dylyet. Ac ỽrth hyny ef
a| rodes y araỽn vab kyn·uarch yscotlont. Ac y vryen y
rodes reget dan y| theruyneu. Ac y leu vab kynuarch. y| gỽr
yd oed y| chwaer gantaỽ yn wreic yr yn oes emrys wledic. Ac
yd oed idaỽ deu vab o·heni. gỽalchmei. a| medraỽt y
hỽnỽ ẏ rodes tywysogaeth lodoneis a gỽledi ereiỻ a
berthynei attei Ac o| r diwed gỽedy dỽyn yr ynys
ar y theruyneu yn hoỻaỽl a| e hen| teilygdaỽt a| e he+
dychu Ef a gymerth gỽreic Sef oed y henỽ gỽenhỽy+
far yr hon a| oed o vonhedickaf genedyl gỽyr ru+
fein. Ac a vagyssit yn ỻys kadỽr jarỻ kernyỽ. Pryt
hono a| e thegỽch a orchyfygei ynys prydein. ~ ~
A phan deuth y gỽanỽyn a| r haf ỽyneb. ef a baratoes
ỻyges Ac a aeth hyt yn jwerdon. kanys hono a
vynhei y gỽereskyn idaỽ e| hun Ac val y deuth
y| r tir nachaf giỻamỽri vrenhin jwerdon ac anneirif
amylder o| bobyl gantaỽ yn dyfot yn erbyn arthur
ỽrth ymlad ac ef A gỽedy dechreu ymlad yn| y ỻe y
bobyl noeth diarueu a ymchoelyssant ar fo. y| r ỻe
y keffynt wasgaỽt ac amdiffyn Ac ny bu vn gohir
dala giỻamỽri a| e gymeỻ ỽrth ewyỻys arthur Ac
ỽrth hyny hoỻ tywyssogyon jwerdon rac ofyn a do+
ethant ac o agreifft a ymrodassant oc eu bod yn wyr
y arthur A gỽedy daruot idaỽ gỽerescyn hoỻ jwerdon
a| e hedychu Arthur a aeth hẏt yn jslont yn| y lyges
A| gỽedy ymlad a| r bobyl honno ef a| e gỽerescynnỽys
Ac odyna dros yr ynyssed ereiỻ yd aeth y glot ef ac
na aỻei vn teyrnas gỽrthỽynebu idaỽ. Doldan
brenhin godlont a gỽinwas vrenhin orch oc eu bod
a deuthant y vrhau idaỽ gan talu teyrnget idaỽ
| « p 109r | p 110r » |