LlGC Llsgr. 3035 (Mostyn 116) – tudalen 98r
Brut y Brenhinoedd
98r
gladu yn|y ỻe hỽnỽ. Ac ỽrth hẏnẏ y·gyt a brenhinyaỽl ar+
ỽylant y gladỽyt yno
A gỽedy hẏnẏ yn|yd oedynt alwedigyon yr yscolheigon
a|r ỻeygyon a|r bobyl y·gyt oỻ. ỽthyr braỽt y brenhin
a|gymerth coron y|teyrnas ac o gyt·anoc paỽb yn gyf+
redin ef a vrdỽyt yn vrenhin. Ac yna coffau a oruc y dehogyl
a|wnathoed myrdin o|r racdywededic seren vchot. Ef a erchis
gỽneuthur ỻun dỽy dreic o|eur a|chynhebygrỽyd yr hon
a ymdangossei ygyt a|r seren arnunt. A gỽedy gỽneuthur
y rei hyny o|en·ryfed gywreinrỽyd; ef a offrymaỽd y|neiỻ
o·nadunt yn yr eglỽys benaf yg|kaer wynt A|r ỻaỻ a|e+
teỻis gantaỽ ỽrth y|harwein yn|y vlaen yn ỻe arỽyd
idaỽ A|phan elei ef y|mrỽydyr ac y gat ac y ymlad Ac o|r
amser hỽnỽ aỻan y gelwit ef vthyr pendragon. Ac ỽrth
hẏnẏ y kafas ef yr enỽ hỽnỽ ỽrth y darogan ef o vyrdin
drỽy y dreic y vot yn vrenhin.
A c yn yr amser hỽnỽ Octa mab hengist ac offa y gar
pan welsant eu bot yn ryd o|r aruoỻ a rodyssynt y
emrys wledic. Medylyaỽ a|wnaethant ryfelu yn er+
bẏn vthẏr ac ehagu eu teryneu* e|hunein. kanys y saeson
y·gyt a|pascen vab gỽrtheyrn a|gymerassant attaỽ ac
eu kenadeu a eỻygyssynt hyt yn germani yn ol ereiỻ.
A gỽedy ym·gynuỻaỽ kynuỻeitua vaỽr y·gyt o·nadunt
dechreu a|wnaethant anreithaỽ gogled gỽladoed yr ynys
Ac ymrodi y|greulonder yn|gymeint a distryỽ y keyryd
a|r kestyỻ a|r|ỻeoed kadarn o|r alban hyt yg|kar* efraỽc ac
eisted ỽrth y|gaer. vthyr pendragon gyt a|hoỻ gedernit a
deỽred y|teyrnas a deuthant yn dianot y ymlad ac ỽynt y+
sef a|wnaeth y|saesson eissoes gỽrthỽynebu yn ỽraỽl y bry+
tanyeit ac eu kymeỻ ar fo A gỽedy kaffel y vudugolyaeth
| « p 97v | p 98v » |