LlGC Llsgr. 3035 (Mostyn 116) – tudalen 11r
Ystoria Dared
11r
haỽr rodi bỽyỻỽrỽ o wenith a|delei o|r deyr·nas vlỽynyded
no mynet y ymlad ohonaỽ y|droeaf. ac y·veỻy y|pressỽylỽys
telepus. achil ynteu odyno a|ymlhoeles y ynys tene ̷+
duni at y lu ac anreith vaỽr gantaỽ ac a datkanaỽd Y
agamemnon a|e getymdeithon a vu eu kyfranc ac aga+
memnon a|e getymdeithon a vu Hof gantunt hyny ac a|e
molassant. ac yn hẏnẏ y deuth y kanadeu at briaf ac iluxes
a venegis gorygarcheu* a·gamemnon ac a erchis eturyt
elen a|r anreith a|dugassei alexander a gỽneuthur iaỽn
y wyr groec ac ymwahanu yn ang·tagnouedus. ac yna priaf
a duc ar gof y|sarhaedeu a|wnaeth y|gỽyr a dathoedynt
yn|y ỻog a elwit argo. ac yn|y ỻogeu ereiỻ gyt a|hi idaỽ
ef ac ageu y|dat a lethysynt a|r ymlad a vuassei gantunt
yn troea a cheithineb esonia y|chwaer. ac odyna pan anuones
antenor yn genat y|roec yr traethu ohonunt amdanaỽ
ef yn waratwydus. ac am hẏnẏ kywilidyus vu gantaỽ
ef yr hedỽch ac anoc y ryuel a|wnaeth ef a|chẏt a hyny ef
a orchymynỽẏs gỽrthlad kenadeu gỽyr goroec o|e vren+
hinyaeth ef ac ymhoelut a|wnaeth y kenadeu y gasteỻ
tenedum a datkanu atteb priaf. ac odyna kynuỻaỽ eu
ryfel yn gyfrỽys a|wnaethant ỽy ac yna y|deuthant y
tywyssogyon hyn yma a|e ỻu gyt a hỽẏ yn|borth y briaf
yn erbyn gỽyr groec y|rei a vanagỽn ni eu henweu
ac enweu y gỽladoed pan anhoedyn yn gedrychaỽl yn
gyntaf o|r wlat a|elwir cilia y deuth funclarus ac ampi+
dracus ac o wlat araỻ y|deuth amphimacus a nestus ac
o|licia deu tywysaỽc. o|lariska. ypodocus. o gogsinia.
riemus. o dracia. pirus ac alkamus. o|frigia antipus. a
phrosius. o|boicio epitrophius. o babliaconia silomenes
o ethiopia. perses a|memnon. o dratia pirrus. ac archilocus.
| « p 10v | p 11v » |