LlB Llsgr. Ychwanegol 19,709 – tudalen 71r
Brut y Brenhinoedd
71r
y|ranho y cledyfeu mi a|e|kymheỻaf ac a|lafuryaf y dỽyn
drachefyn ỽrth sened rufein. ~ ~ ~
A gvedy datkanu y|ỻythyr hỽnnỽ rac bron arthur a|r
brenhined a|r|tywyssogyon a oedynt ygyt ac ef. ef ac
vynt a aethant ẏgẏt hyt yn tỽr y keỽri y gymrẏt kygor
py beth a|wnelhynt yn erbyn y|kymenediveu hynny ac
val yd oedynt yn yskynnu gradeu y|tỽr; kadvr iarỻ ker·nyỽ
Megys gvr ỻawen a|dywaỽt yr ymadraỽd hỽn. kyn·no hyn
ofyn a|ry|fu arnafi rac goruot o|lesged y brytanyeit o hir he+
dỽch a|choỻi clot eu milvryaeth o|r hon y buant vy eglu+
rach no neb o genedloed y byt yn hoỻaỽl. Sef achaỽs yỽ
yn|y ỻe y|peiter o arueru o arueu. ac arueru o|r vydbỽyỻ
a|r daplas a serch gvraged nyt oes petruster yna ỻygru
o lesged py beth bynac a|ry|ffeio nerth yno a|chedernit ac
enryded a|chlot. kanys pump mlyned hayach a
ethynt yr pan yttym|ni yn arue ru o|r ryỽ seguryt
hỽnnỽ a|r digrifỽch a heb arueru o diwyỻ ymlad. ac vrth
hynny duỽ yr mynnu an rydhau ni o|r lesged honno a
gyffroes gỽyr rufein yn an|herbyn. hyt pan alwem|ni
an clot ac an|milỽryaeth ar y hen gynefaỽt. a gvedy
dywedut o gadvr yr ymadrodyon hynny a|ỻawer o|rei
ereiỻ. o|r diwed vynt a doethant y|r eisteduaeu. a gvedẏ
eisted o bavb yn|y le. arthur a|dywavt val hynn vrthunt. vyg
ketymdeithon. ar rvyd ac ar|dyrys molyant y|r rei a|profe+
is hyt hyn. ac yn rodi kyghoreu ac y|milvryaeth. ac ar
avr·hon o vn vryt rodỽch aỽch kygor. ac yn doeth rac+
vedylyvch py|beth a vo iavn y atteb yn erbyn yr attebyon
| « p 70v | p 71v » |