LlB Llsgr. Cotton Titus D IX – tudalen 68r
Llyfr Blegywryd
68r
rỽg brenhin a|e|tir dylyet yn|llei yspeit no
chann mlyned. Gỽedy|bo rann odeuedic
rỽg kyt·etiuedyon ar|tir. nyt oes vn ia+
ỽn y|vn ohonunt ar|rann y|llall. ac eti+
ued idaỽ. eithyr o|attrann pan del y|hamsser.
Pỽy|bynnac hagen ny|bo etiued idaỽ o|e
gorff. y|gytetiuedyonn nessaf o|vyỽn y|te+
ir ach o|r kyff a|vydant yn|lle etiuedyon
idaỽ. Ny dichaun neb o|gyureith dilyssu
tir yn erbyn etiuedyon y|arall. onnyt
ar|eu kyt|les. neu o|duundeb. neu aghen
kyureithaỽl. na|rodi dim ohonaỽ ar
yspeit. heb|teruyn gossodedic y|gallo
y etiuedyon y|dilỽg. Os dros da y|ro+
dir rac aghen. na|dotter arnaỽ namyn
deuparth y|werth. ac onny byd velly. y
etiued a|e keiff pan|y gouynno o|dichaun
gỽrtheb drostaỽ yn|gyureithaỽl. Y|neb
a|gaffo y|tir dylyet trỽy dadleu yn llys.
a|thrỽy varnn. ac na allei y|gaffel heb
hynny. ny dyly talu prit drostaỽ. ac ny
dyly gollỽg dim o|da kyffro a|ordiỽedho
ar|y|tir y kynnhalaỽdyr. Pỽy|bynnac
a|bressỽyllo ar|tir dyn arall. heb y|ganny+
at. dros tri dieu. a|their nos. holl da
kyffro hỽnnỽ. perchenn y|tir bieiuyd.
| « p 67v | p 68v » |